اسمعني لحظه لو سمحت
القصيدة مسموعة:
http://www.4shared.com/file/14113485/322c2558/_p__.html
العسكري ضرب الحصان لابيض قوي
مش راح تكون الفارس الجاي بالخلاص
مملكتك الواهيه خلاص استسلمت
وبحركه واحده الموت هايسكن طابيتك
وما عدش دم يكفّي ترسم بالكلام صورة شهيد
كل اللى جاي .....كل اللي فات
هاتقوله ....... كش
اسمعني لحظه لو سمحت
بيني وبينك مش بعيد
لكن ملامحك ليه بيسكنها الغريب
ليه الحكايه اللى بنبدأها سوا ...
.... دايما بتاخد سكّتين ؟
حتة مرايه أكيد تفيد ..
.. لو كنت بتدور عليك
كل الصوارى ما تفيد.....
لو شطك المقصود سراب
اسمعني لحظه لو سمحت
شعرك حزين
قلبك حزين
علشانُه فرحك تخنقه بموقف حزين
خايف من اليوم اللى جاي ..
.. واللا بتندم ع اللى فات
والتوهه واخداك للبعيد
وأنا بس فين
اسمعنى لحظه لو سمحت
لما المداين تتولد فيها مدن
لما الحدود تملا الدروب
اطرح جروحك ع السلوك الشايكه ..
.. واتهجى الألم
يمكن تبيع .. حبة غُنا
اسمعنى لحظه لو سمحت ...... علشان باموت