لسه فاكر لما كنت في ابتدائي
كنت عيل
بس كان موجود في قلبي
الف ميت مليون فدائي
لما بسمع اسم مصر
كنت بسمع أحلى نصر
لما كان استاذي يشرح
كنت بفرح
كنت اشوف الجيش بيعبر
كنت بسمعها بوداني
صيحته ف الله أكبر
كلمة بيتغير كياني
كلمة بتشرف وداني
كلمة فيها ألف نصر
نحكي بيه طول الزمان
النهارده وكل عصر
وانا من حظي اللطيف
كنت بلمح صوت جنودنا في أي طيف
كنت اشوف عبد اللطيف
كنت اشوف سيد حميده
كنت اشوف اصرار عزيمه
لما كان استاذي يشرح
(يا بلادي كبري واسعدي في كل حين
يا بلادي جاء نصر الله والفتح المبين)
كنت حاسس ان صوته مش مجرد صوت وخارج
كنت حاسس انه سيف
سيف بيدبح سيف يحرر
سيف بيمحي أي زيف
رغم احساسه الرهيف
غصب عنه
اصل اخوه عبد اللطيف
مات شهيد لما دمر ويا صحبه
الحصين خط بارليف
الصهاينة قالو جيشنا
والسلاح والحرب لينا
خططو لسينا الحبيبه
دمروا أحلامنا فينا
حربهم كانت كلام
واحنا بنصدق كلامهم
لما جوم ضربو المدينه
صحوا فينا الكره ليهم
خوضنا بحر الموت سفينه
كان سلاحنا الحب بيننا
والإيمان ويا العزيمه
اللي قالو جيشنا صامد
قالو عنه جيش لا يقهر
قلنا جيشنا بالعزيمه
بكرة يقدر بكرة يعبر
دمر البارليف بتاعهم
بصيحته الله أكبر
الله أكبر
يا حبيبتي
من ساعيتها لسه فاكر
لما كنت في ابتدائي