أنا قلت ايه يا بلد
والله عليه العوض
فى الحكم لما يهون
ويمسكه المجنون
بسنين من غير عدد
والله عليه العوض
وبلدنا من غير ناس
فيها عبيد تنداس
تحلم بلقمة عيش
ما هى كلها حرافيش
وتجيب منين الولد
والله عليه العوض
مين قال دى مصر النيل
أُم التاريخ موصول
مين قال دى مصر النور
فيها الحجارة تثور
لو يوم حاكمها اتعبد
والله عليه العوض
ليه الإرادة خلاص
راحت مع الإخلاص
ليه الكلام مكسور
يطلع ذليل بالدور
غابة وحاكمها أسد
والله عليه العوض
يا بلاد عيشتها سواد
بتموت فى الاستعباد
عايشين ومش عايشين
وخسرتوا دنيا ودين
لازمتها ايه يا بلد
والله عليه العوض
ايه معنى كلمة حق
معناها قولة لأ
فى وش أى جبان
متخفي بالسلطان
وفاكرها ليه للأبد
والله عليه العوض
ايه معنى كلمة موت
معناها فى الملكوت
غاية الجبان بندامه
قدر الجرئ بكرامه
ميموتش فيه غير جسد
اخترتوا ايه يا بلد