" هى دى بلادنا يا عبلة "
" جواز عتريس من 22 فؤادة باطل !!"
بقلم: مسعد حجازى – تورنتو/ كنــدا
كاتب وصحفى مصرى- كندى
أعرف أننا نعيش في زمن العبث واللا معقول ...
زمن العجول لا العقول ....
زمن المحافظين الجدد والمغول
مخرٌبوا الديار والحقول .....
والله ما أنا بـ " شاعر" ... إلا بالحزن والهم والقرف !!
ياللا يا حسان يا سلمان يا وهدان يا عبدالله دقوا الطبول ...
كله يصرخ صرخة قوية ويقول :
إحنا مين؟!!.. إحنا فين؟!! ... فى بلادنا واللا فين؟!!
زحف التتار الجدد خلاص ابتدا... من زمان ابتدا....
بس المرة دى التتار من جوانا
من عندنا ... منا وعلينا ....
ده جهاد وده قاعدة
ده توحيد وده دعوة
ده سلفية وده أشعرية
ده مهدية وده أباضية
ده تكفير وده هجرة ...
عزلة مكانية وعزلة شعورية
لكهوف الجهل والتخلف والعصبية
ده وهابى وده طالبانى
والكل عند بوش إرهابى
وعندنا سلطة ومهلبية!! ...
جهل ومرض وتخلف و دعوة للأمية
أصل محوها فى نظرهم دعوة يهودية!
ياسين بقه خانكة وعباسية يابهية !.....
أصل الحكاية ضعف بصر وبصيرة
وجهل بجوهر الدين والعقيدة .......
إسراف فى التحريم
التباس فى المفاهيم
إتباع المتشابهات
ترك المحكمات
أنيميا عقل ودين
وتعصب عرقى ومذهبى
ونقص حاد فى الفياجرا والمقويات!!
* * *
وده حاكم بأمره وهوه أمره مش بإيده
وشعاره "ياسيدى أمرك أمرك ياسيدى
مقدرش أخالفك لأنى عارفك تقدر تحط المارينز فى بيتى"
وبحديد عز قيدونا من ايدينا ورجلينا ….
ينقطع لسان اللى يقول كلمة الحق فى بلادنا
بسكين حامى ...
ماركة زرقاوى واللا زفتاوى
ورقبته كمان فوق البيعة ...
كله أصبح عند العرب صابون
كله يهون عشان خاطر عيون
علاوى وبوش وبلير وشارون
إحنا مين؟ !!.. إحنا فين؟!! فى بلادنا واللا فين؟!!
هىٌ دى بلادنا ياعبلة .... مأساة كاملة ... بعد العملة ...
زمان فى اللد والرملة والنهاردة فى الفلوجة والبصرة
حنحرر إيه واللا إيه!!
* * *
وهولاكو العصر رجع بلادنا من تانى
رجع لبغداد برضه من تانى
لأمة بتعانى من شعارات وأغانى
تقطع الخلف وسنينه عاللى ناوى...
أمة منكوبة ... من جوه ومن بره منهوبة
مطعونة فى شرفها ياولداه وفى القلب معلولة
مسلوبة إرادتها واللا مشلولة
أتارى العلقمى لسة عايش بس دلوقتى اسمه علاوى
رجع هولاكو من تانى ومعاه حكام لئام ...
كلهم نيام نيام كالنعام
ده مشير وده أمير...
ده ملك وده كتابة ...
وده رئيس غيره مفيش
وده أشوس وأصله شاويش
وعينيه القوية حاتنط برة
من شرب القات والحشيش
ليل ونهار يأكد لسيده بوش
إرهاب خلاص ما عندوش
مايلزمهوش ......
وده عامللى فيها أمريكانى
مع إن بوش من رجله مايخلعهوش
وجنس التراكوة يقولوا عليه برطوش
وده كرشه قدامه ياكل مال النبى
حتى عرش أبوه ياولداه ماسبهوش ......
وده يهرب يهود الفلاشا
يقبض المعلوم وياكل بوغاشا
وده روش طويل نحيل وشعره منكوش
فكر معندوش ومخه مهبوش
وده سلطان زمانه متنبل ...
مداروش ومخه مهروش ...
والكل خايف من شارون وبوش
على حكمه وعرشه لا يبوش ...
جرذان ... قطط سمٌان لكن علينا أسود مستأسدة
ووقت الجد الكل يجرى جرى الوحوش.
إحنا مين؟!!احنا فين؟ فى بلادنا واللا فين؟!!
هىٌ دى بلادنا ياعبلة .... مأساة كاملة بعد العملة
* * *
القول على حكام أشاوس
تنابلة وبقوا ملوك وسلاطين
حطوا راس العرب فى الطين
بعد ما ضاعت فلسطين
ونسيوا عين جالوت وحطين
*
القول على دراويش .. غيرهم مفيش
قاعدين على قلوبنا .. يحرقوا فى دمنا
ويهددونا بقطع العيش ...
وبالشرطة والجيش
أصل بلاد العرب من زمان بقت وسية
قبائل هى لم تزل لكن لها أعلام ..
سفارات وخمارات وقنوات فضائية
والنفط بحور وبحور وبحور
من كثرته قاعد الشيخ ينقط جنب الحنفية
فاكر نفسه بحق وحقيق ملك والا أمير
لسه مش عارف انه مجرد خفير
بس بدرجة رئيس والا أمير ....
إحنا مين؟!!احنا فين؟ فى بلادنا واللا فين؟!!
هىٌ دى بلادنا ياعبلة .... مأساة كاملة! بعد العملة
* * *
وخد عندك كوبونات نفطية ... صدامية وخليجية
حط منها على ودن القرد يلعبلك ويتنطط
وإرمى له "موزة" والا "موزاية"
يكتب في مدحك معلقات وقصائد ...
وملاحم وبطولات وهمية
فى جرائد انت فيها القائد .. المناضل.. أبو الوطنية
بس ياشيخ والنبى ما تقطع الجوابات
والكوبونات والعيدية ... وملعون أبو القضية
* * *
إن راح بوش وألا جه كيرى ماتفرقش كتيرى
مادام حيفضل عندنا الجحش أبو سديرى
كاتم على أنفاسنا ويحكم بلادنا بالميرى
والكل قاعد ينهب فى خيرى وبترولى
و مادام لسه بيقولوا على الشهيد إرهابى
والله ياأمة الطير ماهو طيرى
إزاى وهوه بيشرب من إناء غيرى!!
* * *
حُكامنا طول عمرنا حاكمنا بالحديد والنار
بيقولوا علينا عايشين فى جنة واحنا فى نار
خلاص ماعدش فيه ثورة ولا كفاح ثوار
عقلى احتار وطار ياأفكار
ولاد الأبالسة ألف مرة أفظع من الاستعمار
مفيش فيهم أسد حقيقى .. غضنفر
يرفع الظلم والحصار ...
يحرر الأرض والديار ...
يمحو العار ... ياخد بالتار
يطفئ نار بركان الغضب
اللى بيغلى فى الصدور
إحنا مين؟!! احنا فين؟!! فى بلادنا واللا فين؟!!
هىٌ دى بلادنا ياعبلة .... مأسى كاملة!
بعد العملة .... زمان فى اللد والرملة
ودلوقتى فى الفلوجة والبصرة
حنحرر إيه والا إيه ؟!
إحنا مين؟ !!.. إحنا فين؟!! فى بلادنا واللا فين؟!!
إحنا رايحين على فين؟!! ماشيين لقدام واللا بنرجع مرشدير؟!!!
بعد ما هاجرنا على كندا وأمريكا ... ياربى نهاجر على فين؟!!
فينك يا أدهم ياشرقاوى ؟!!!
ارجع من تانى ....
ارجع طوف وشوف لما الزمن بيخيب
والسبع يصبح أسير الكلب واللا الديب.....
فينك تصرخ من تانى وتقول :
لا احنا عبيد نتملك ولا تراب ينداس
أنا رايح وبكره جاى والظالم المفتري بكره ميعاده قريب...
ياعالم ياهوووه ..أفهموها بقة ...
هوه صحيح الشرع حلل أربعة
بس جواز عتريس من إتنين وعشرين فؤادة باطل ..
باطل ...باااااااااااااطل ... باااااااااااااااااطل .
Email: mossad_hegazy@hotmail.com