ملاحظة رقم (1): مجرد محاولة لا أعرف عنها شيئًا، لا موسيقى ولا جرس ولا وزن ، فكرة خطرت لي عن هذا الواقع الذي نعيشه وأحببت أن أشارككم فيها ، وأقبل أيّ ملاحظة بصدر رحب من أجل أنْ تعمّ الفائدة على الجميع وكي نستفيد من علم وخبرة أساتذتنا المشرفين الشعراء الأفاضل .
ملاحظة رقم (2): من وحي قراءة نصّ " مين قال علينا بشر" للشاعرة والناثرة المبدعة ربيحة الرفاعي .
***
بيقولولي سيبك منهم
وخليك ف حالك
دي ظروفك سيئة
متشغلش بالك
سيبهم لربهم
وريّح بالك
*
دول يا بني وحوش
هيخلوك تدور
ف ساقية فاضية
مفيهاش ميّة
وصاحبها تور
*
هتتعب معاهم
ويألّبوا النّاس عليك
وهتمشي تكلّم نفسك
وتعض م الندم إيديك
*
بيقولولي انسى
دي الدنيا كلها فاسدة
هتصلح إيه ولا إيه
يا بني خليك ف حالك
*
بيقولولي نمْ عشان ترتاح
واقفل عقلك بأيّ مفتاح
وغمّض عينيك ع الحقيقة
وخلّي نظرتك ليهم بريئة
دول م يعرفوش ربنا
سيبهم وخليك ف حالك
*
دول يا بني بيعرفوا
يزوّقوا الكلام
د الكذب لعبتهم
ويخلّوا القرد غزال
م الإعلام ف إيدهم
ويعملوا م الحبة قبة
ومحدش يقدر يحاسبهم
د انتا مش قدّهم
ولا قدّ خبثهم
هيودوك ف داهية
وتضيع في شربة ميّة
سيبهم لربهم وسايرهم شويّة
هتصلح إيه ولا إيه
والنّاس كلّها نايمة
*
يا بني دا الكرسي
غلبان
بس صاحبه حيوان
يقتل ويسجن
من غير أحكام
*
هتروح منهم فين
وانتا على قدّ حالك
د انتا مش لاقي تاكل
والنحس ماشي قدامك
خليك ف حالك وانسى
دي الدنيا كلها فاسدة
هتصلح إيه ولا إيه
سيبهم لربهم وانسى
*
قلتلهم مش هنسى
ولا هقدر أستنّى
دا الليل طوّل كتير
واحنا لسّه صابرين
بنقول يا ريت بكرة
يا رب يكون أحلى
*
بس هيجي بكرة منين
وإحنا ع طول ساكتين
وم الحكام خايفين
بنجري ليل ونهار
ورا رغيف مسكين
عملولوا جناحات
علشان يطير
يا ناس فوقوا بقى
د إحنا
من قلّة الموت عايشين