قطر وقطر هيبقوا اتنين
وقضيب واحد مش قضيبين
الله التحويلة راحت فين
بدلنا الوزرا خلاص الاتنين
لجل نحافظ ع القطرين
ولسة قضيبنا واحد يا جماعة
رغم اني بشوفهم يوماتي اتنين
وقطر وقطر هايبقو اتنين
سوا ع السكة يانور العين
يحضنوا بعض بشوق وحنين
يروي الموت بدما الغاليين
ما شاء الله علينا رحنا وجينا
وزير آهو مشي
والتاني رحا فين؟؟
عامل تحويلة واخد تعسيلة
والناس ولا حولة ولاحيلة
كدة راح تبقى بلادنا جميلة
والإهمال في حياتنا وسيلة
وغاية كمان وقلوبنا ذليلة
من الاهمال بس نروح فين
قطر وقطر هيبقوا اتنين
ووزيرنا في قراه السياحية
والدستور في حياة انسيابية
يبقى تصادم بين قطرين
تحجز شبر مابين قبيرين
عدد الموتى صبح ألفين
وكمان قتلى بالملايين
عيني يا ليلي يا ليلي يا عين
أكتب سطر يجيب سطرين
م العياط لبحيرة يا عين
هاتبكي العين بالدم سنين
أصل القطر صبح في بلدنا
أخطر من قنابل هيروشيما
وضرب النووي كمان في الصين
وقطر وقطر هيبقوا اتنين
محتاج وطني بكل بساطة
نبطل نتصرف بعباطة
نبطل نفطرتاني بطاطا
ونلغي قانون الكوسة ببساطة
يلا نمسي على القوانين
قطر وقطر هيبقوا اتنين
عندي موبايل بشريحتين
رنيت بيهم على ضميرين
والخطين مشغول يا خواتي
مغلق الاتنين غير متاحين
والموضوع مابقالوا نهاية
نقطة آخر السطر منين
وقطر وقطر هيبقوا اتنين
ع الموضة راح هنادي ريسنا
يا حبيبنا يارافع لرايتنا
حبك جوا حياتنا وبيتنا
ع الوزرا ماحناش قادرين
انقذنا ياريس وانجدنا
دي جيوبنا آهي نضفت وانضفنا
والتذكرة ف إيدينا رافعين
ع البيجو ماحناش قادرين
فقرا الشعب صحيح مساكين
دا حتى شعارنا ف أرض وطننا
أدخلوا مصر يا ناس آمنين
نظرة ياريس دا أنت حبيبنا
وساكن جوا الروح والعين
ليه القطر صبح قطرين
وقضيب واحد متقابلين