إخواني السلام عليكم
هذه نتية سريعة لعلها تروق لكم في زحمة الوقت ولعلكم تتذكروننا إذا كتب الله لنا الشهادة
تقتل وِلادك ليه .ياعاطفي جداً
وإن قلنا يابا حرام تغضب تقول بُعداً
هوَّا إنت صنفك إيه مش برضوا أبوك مصري
ولا سواد جوفك خلَّى السواد حصري
تطلع علينا بزوق بعدين تبخ هباب
وتهدد اللي انقتل تطرشها دود وعتاب
هاتحمي مين يا جدع دا الشعب كله هناك
ولَّا العمى بهدلك و والعنتظة وخداك
يا مْبارك اللي اختشوا في مصرنا ماتوا
والكرسي لازق بغيرة إكسر إيديك هاتوا
اضحك على الجاهلين و بالقفا ادِّيهم
يستاهلوا كف إيديك مش نجَّحوك فيهم
مِيَّاتْنا راحت بتشكي للعليم حالنا
وألافنا جرحى اخْتِشي سيبنا بقى فحالنا
هيَّا لاكت عزبتك و لا تركة سابها أبوك
تلاتين سنة تكفَِّيك بين ناس لُطاف خلُّوك
لو كانت النخوة نخوة من زمان فالقلب
كانْ كسروا رجل سعادْتْك و نغزُّوك فالجنب
شلِّة حرامية تمشِّيها بربع جنيه
إيه يبقى إسمك بقى وإنته رئيسها يا بيه
جرِّيت دموعي يا لُكلُك بتقول أموت فيها
مصر خلاص تَفّْتَكْ فافهم معانيها
حَفَرْت قبرك بظلم الفقرا يا مخلوع
شِبْعِتْ مصَارينَكْ ومصَارينَّا تموت مِ الجوع
إحنا اللي كُنَّا غلط لما رضينا بيك
والخزنة نفَّضتها مبقيش خسارة فيك
بتلف كالتعبان حوالين ميدانا كمان
وعنيك تدور يا جدع تُبْرُق تقول شيطان
إِبكي على نفسك وِ سِنْ سكاكينك
راح يدبحك حدهم وعليك أسافينك
قالوا على الباغي تدور دواير المر
وانتَ ألاعيبك راح تُحْشُرك في القبر
أسيادك اتْلَهلِبوا من ثورة الملايين
أتاريك رئيسهم وهمَّا نصبًّوك عرشين
عرش اليهود في المكر واللعب ببْلادنا
وعرش أمريكا انشرخ محتارة ف صمودنا
وقتلتني يا (عُكَل) و يهون عليك دمِّي
الكرسي ولَّا أنا يا وَاكِلْني من كمِّي
سهم الدُعا صابك وخسرت أمجادك
دا حكم رب عظيم نازل هنا قصادك
ياعابد الكرسي كفنك ملهش جيوب
بحر الدِّما غرَّقك للوزر ألف حَاْسُوب
كان فيه عِبَارة يابو العبَّارة والقُطُرات
مَيقعش غير شاطر فِ بحر ذكائو عدَّى وفات
وانته ذكائك عجب مخك تملي تخين
لخبط عجين لخبطو وآخرتك نارين
تفضل سنينك بِلا نائب ولا ديَوْلوا
والسلك حين يضربك تمسحلو وتحايلو
إرحل بسيفك وطيفك حتى مش عايزين
نشم ريحْةِ النجاسة بزهرة الياسمين
بهية غالية و توبها ومهرها دمِّي
أنول شهادة وهاحمل همِّها وهمّي
بهية صالحة و صالِحْها حِدانا شهيد
لبِّسها عقد الكرامة كتب كتابو العيد
وِ ريحتها م المسك الجميل جابو
حمرا بلون الدما دَا من رصاص صابو
دمتم بحميتكم
ونصر الله مصر وشعبها الرائع
الذي يضرب اروع الآمثال للتحرر والصحوة معا