قصيدة عاش الزعيم
نظرا
لأن النعمة فاقت حدها
ولأننا مش قدها
ولأن فعلا إنجزاتك فوق طاقتنا نعدها
ولأننا غرقنا ف جمايل مستحيل هنردها
نستحلفك نسترحمك نستعطفك نستكرمك
ترحمنا من طلعت جنابك حبتين
عايزين نجرب خلقة تانية ولو يومين
أسمع بقى
أحنا زهقنا من النعيم
ونفسنا ف يومين شقى
عايزين نجرب الاضطهاد
ونعوم ونغرق ف الفساد
بينيى وبين حضرتك
ده شعب فقرى ميستحقش جنتك
أنا عارفه شعب مينفعوش
إلا شارون وبلير وبوش
عاوز يجرب الامتهان
ويعيش عميل للأمريكان
بيمد غازه لاسرائيل
ويومين كمان ويمد نيل
آه يعنى نشرب مية واحدة
ندوب سوى
ما.....ء وما.....ء وما....ء
ونفض سيرة الانتماء
وبلاها نعرة وطنطنة
تبقى البلاد مستوطنة متسلطنة بالسرطنة
إيه اللى خدناه م الكرامة والأباء
حبة خطب وكلام كلام
أحنا رهنا ع النظام
ورضينا بخيار السلام
بخيار خيار
هنسد عين الشمس بيه
علشان ميطلعش النهار
يطلع لمين
حبة معارضة مغرضين
وحسب بيان السلطة
شلة مأجورين
ياعم فوضك سيرة
وارضى بقسمتك
ده شعب مش فاهم أكيد
ياله اطرده من رحمتك
وان كنت غاوى الحكم
خليك مطرحك
وانا هغطس واقب
واعود بشعب يريحك
راضى وعمره ما يجرحك
أخرس وما بيسمعش واعميلك عنيه
مش كل قرش يبص فيه
ما يقولش لأ وفين وليه
تضرب ينفض ف السليم
وعلى الصراط المستقيم
وكل اللى بقدر ينطقه
عاش الزعيم يحيا الزعيم