شخابيط...... لخابيط
شخابيط شخبطه
لخابيط لخبطه
ناس متربطه....ناس متمرطه
ناس متورطه...ناس متزبطه
أنا شفت كتير
.فلاح وأجير
طيب وأمير بيشده غفير
والتهمه فقير
يرموه فى البير
ماهو أصله فقير
ومالهش جناح
ازاى يرتاح
وينام فى براح ؟
تايه سواح ...وف قلبه جراح
ما نا شفت كمان
عين الأعيان
ابن السلطان
سارق أحلام
الناس والجان
لص وتعبان
ومعاه أعوان
قاضى وسجان
اقوى من الجان
اشكال والوان
ماهو أصله ياناس
الناس أجناس
ناس متشعبطه
ناس متزبطه
ناس متربطه
ناس متورطه
لص بينباس يتشال ع الراس
وعليه حراس
دقين متراس
شايلين أجراس
وشريف ينداس...!!!!
فوق راسه مداس
وعليه حراس
سجن وأجراس
لجل الوسواس ابن الخناس
ملعونه الناس
انا كنت زمان...راضى وقنعان
عايش سلطان...شغال تلال
عتال زبال...ومعايا عيال
والعيشه حلال
من غير لخبطه
من غير شخبطه
ولا كنت باشوف
كده عالمكشوف
تزوير فى كشوف
وتزف خروف
وكمان ملفوف
ومعاه مظروف
لكبير معروف
ومعاه هاتشوف
كده عالمكشوف
حلمك مخطوف
حواليك بيطوف
وانت ياغلبان
تفضل تعبان
طول ما الغربان
شايفاك عيان تايه توهان
دايما نعسان
خليك نعسان ...النوم سلطان
شخابيط.......... شخبطه
لخابيط............ لخبطه
ناس متزبطه.....ناس متشعبطه
ناس متمرطه....ناس متورطه