عَمْ يِسألوا :
“شو يعني بنت الشام؟
مِن وَيْن إنتي يا بِنِت?
معقول من لبنان؟
أو ...
لأ...
من عَمَّان
لأ ...
لَهِجْتِكْ بتقول من حوران"
لأ يا بشر
لا تِغْلَطوا
أنا ... بنت كل الشام
وَيْنِك يا دنْيِي
بْتعرفي شو يعني ... كلّ الشام؟
لبنان والأردن سوا ...
وسوريا
الاسْكنْدرُون
وستِّ الدني فلسطين
ستّ الصبر حتى النصر عالظلم والظُّلاّم
هيدي يا دنيي الشام
بِرجَالا بتدوس القهر
وبتغلب الأيام
بتدوس بيكو وسايس بالرجلين
وبتسحق اللي مزّعوا أرض الشرف
وتوزعت
تا فكروا بسكوتنا حننام
عن حقنا ...
عن أرضنا ...
ونسْكُت عن الظُلاّم
نِسْيوا مَراجِلنا وبَنُوا
دولة على الأوهام
وتْلَوّنِت أعلام
بَسْ الشرف ما نام
واليَوم قِمنا
نكسّر الأصنام
وِنْلَمِلْك يا شام