لأى حد بيفكر لأحلامه ويقول كفاية،
وأى حد أحلامه ماتت وعاوز يخرج من همه،
لكل مشروع جديد بيتعمل،
لكل مجروح جديد وسطنا،
لأى حد شايف ان الرساله دى ممكن تنفعه،...
أهديكم الفضفضه دى
مَجْروح لـِيه؟
هو خلاص اليأس اتمَكِنْ من أحلامك..!
وللا حماسك / داب مــ الصبر وتاه حواليه.؟
خللى العزم شديد جواك
لسهَ طريقك فيه أشواك
اوعى تْسَلِم لو تلاقيه
راح تتألم
بس دَ عادى
خليك راضى..
كَمِّل وامشي راح تنهيه
لاجل الورد تشمه وتفرح,
لازم تجرح إيدك فيه.
لاجل نهارك تشرق شمسُه،
تـِلْقـَى سواد الليل قـَبْلِيه
تـِلـْقـَى دْيـَابَهْ كتيرَهْ بـْتِعـوي
وسط الضلمة اوعى تخاف
إياك حتى تـْبُصْ عليهم
سيبك منهم
حـِلمَك أوْلـَى تبُص عليه
إياك تعمل زيي وتنسى
بعد شوية الدنيا هتقسى
وهتتغلـِّب
وهتتعذَِب
وتلاقي عزيمتك تنهار
إما تدافع عن أحلامك
وتعافر ضد التيار..
أو ترتاح وتبطَل غـَلَبَه
إيه يعنى ما تعيش فـِ العار!!
مـَ أنا قدامك قاعد عاجز
بينى وبينها مليون حاجز
عايش وسط الناس فـِ مرار
اوعاك يابنى تكون محتار
سيبك مني وشُق طريقك
جَدِد عزمك باستمرار
وابقى ادعيلي
لو يوم توصل..
واتْرَحَّمْ على حلم اتْكَسَّر
ضاع ما اتْفَسَّرْ
علشان صاحبه ماخدش قرار
cryheart
11/2008