الحِداد
يعني إيه هو الحِداد؟
يعني وقفة صدق جد وفي المعادْ
يعني اصحصح وافوق شوية، مش حقضيها رقادْ
يعني أعرف مين معايا ومين ورايا
ومين دا يقدر ع السدادْ
الحِدادْ
يعني إيدي ف إيد أخويا وصاحب صاحبي
واللي هاجر واللي عادْ
يعني أعرف مين عايزها بجد تولعْ .. ويقول فصاحة: احذروا هذا الرماد!
يعني أعرف من صديقي وقلبه عندي
ومين عدوي ومين شادد لينا الزنادْ
هو دا يعني الحداد.
الحداد ياخوانا فوقوا مش بيانْ
مش تقصّي للحقائق!!
ومش لجانْ
الحداد يعني وقفة صدق جدْ
وفي المعادْ
مش تعازي أو سواد!
الحدادْ
يعني أعرف مين بيبني ومين سيبني للذئاب
ومين بيزرع ومين بيقلع ومين بيرويها سموم ومين بيرميلها سماد
مرة فوضى وهسترية
ومرة أصل الأمن غاب
يعني أعرف فين حقوقي؛ حق خالد، حق مايكل، حق بنت الشيخ عمادْ
وحقي أعرف إني آدم، يعني إنسان مش جمادْ
الحداد
يعني اتحاد
يعني احتشاد من أجل مصرْ
يعني أعرف اللي أفسد فِ البلاد..
يعني أعرف بس أعرف بالهداوة مش عناد
واحدة واحدة مين اللي يقدر بس يعدي بالبلاد
يعني آخد حقي فعلا
يعني آخد كل حقي
يعني آخد تار ولادي
واشوف بعيني عدل ربي في اللي قتّل في الولاد
فِ اللي دبح طير بلادي
وقال دا عادي
ماذا أفعل؟
فِي اللي دبّر واللي خطط واللي أفسد كل وادْ
في اللي حزِّن كل أم وكل أب
في اللي حزن مصر أمي واللي لبسها السواد
يعني القصاص وعدل ربك ف العباد
هو دا معنى الحداد
مصر 2-2-2012
ولد الجنوب