جميل الحب لو نسهر ندادي عنيه
جميل الشعر لو نحضن دفاه ساعه
ولو يرجف
نسمِّي عليه
جميل الحلم لو طلع النهار صدفه
فراح طالل ومد ايديه

رشا






بدندن ألف حدوته وحدوته
على شط الخيال يمكن
أكون حاجه عشان سكه
أكون ضحكه
أكون بكره
أكون زي الربيع لو طال
ومعرفشي يكون ذكرى
ودندنتي
أكيد حلوه
عشان مش جايه مرسومه من القلب اللي ساكني
ولو كان يعني متمني يكون جنه
ومستني
ولا جايه كغنوه من بحور فني

ولو اوتارها تحضني
لكن حلوه
عشان قَدَر الحروف فعلا تكون حلوه
بشوف منها حاجات ياما
وحاجه تعدي والتانيه تسيب حلمي في دوامه
ما بين فرحه وبين تنهيد
وساعات أرضى
اذا اللحن اتعزف ضحكه بحرف جديد
ساعات ابكي اذا دمَّع كنيل مسجون في قب وريد
وساعات أجري
كأن النسمه عايزاني أعيش أجري
مع ضفيرتي
ودندنتي
متخلصشي
وأحزاني تروح فجأه مترجعشي
واذا رجعت أعيط ساعه واكتبها
ومندمشي
واحاول اتسجن فيها مع سكوتي
ومقدرشي
عشان صوتي
ميتعودشي يكسفني اذا دندنت حدوتة رضا مره
ولو مُره
يطيِّب جرحي بالمرة
يعديني
ويوعدني
ليبقا المركبه ديما
ويبقى شراع
يرفرف في السما للضي لو مكسوف من الاوجاع
ويحلف انو لو شاري فليه نبكي ع اللي اتباع
.
.
.
أكيد فعلا
جميل جدا
جميل الحب لو نسهر ندادي عنيه
جميل الشعر لو نحضن دفاه ساعه
ولو يرجف
نسمي عليه
جميل الحلم لو طلع النهار صدفه
فراح طالل ومد ايديه
جميله الدندنه جدا
اذا سمعناها قلنا الله
ومش لازم نفسر ليه ....!!