شعب صابر
الهرم فوق الكتاف
والقنال جوه القلوب
والبحيرة باسم ناصر سميناها
حفاراتنا كانت ضوافر
والكتاف كانت قوافل
شعبنا طول عمره شعب المعجزات
لحمياتنا ... عضمياتنا ... دمنا
أكبر دليل علي إننا
نملك قناتنا والبحيرة والهرم
في البحيرة والقناة
قبل المياه كان فيها يجري دمنا
والهرم .. جوه الهرم
في لحمياتنا و عضمنا
لو تعصروا حجارته تقطر دمنا
شعبنا طيب أكيد .... لكن عنيد
رافض الليل مهما طال
شايف الصبح البعيد
يجي فارسي أو روماني أو صليبي باحتلاله
أو فرنسي أو يهودي ولا غيره باحتياله
شعبنا عمره ما بيغير خياره
شعب صابر بس قادر
تيجي لحظة من تاريخنا
قوة الشعب اللي صابر
تنفجر في القلب قوة
يهزم الهكسوس في سينا
يبتسم وجه المدينه
يرمي كل صليبي جانا معتدي في البحر الابيض
ينشرح قلب الحزينة
يملك العامل مصانع
يبدر الفلاح رمال البور مزارع
تختفي ريحة البطالة من الشوارع
ترجع الشمس لمدارها
تحضن الأرض صحابها
تغزل الأوطان بأمجادها تيابها
شعبنا ماهوش مغامر أو مقامر
بس لما يضيق علينا الحال وبينا
تضيق دروبنا في المدينة
يصبح الحكام أساتذة في النخاسة
ينفجر جوه ابتسامة الطفل فينا
ألف ثورة
ينتفض قلب المدينة
تنتحر فينا الزوايا المستكينة
تهدم الزنزانة وتفر لطرقها
فينا أحلامنا السجينه
رد مع اقتباس
المشاركة الأصلية كتبت بواسطة محمود العريان
