حديثك كان كلام هايف
كلام شايخ كلام فاجر
دبحت الدوله
ببرودك
وجبروتك
وهيمنتك
ولسه فيها بتآجر
سرطنت البدن والأرض
أبحت فيها هتك العرض
بقينا اضرحة ماشيه
وانت لسه بتتاجر
حديثك كان كلام فاجر
حديثك كان كلام فاضي
ماهوش موزون ولا بقافيه
عشان مهزوز ومش موزون
حاولت بسهوكة وطيبة
تصيد الصوة بالعافيه
سمعنا هرتله فاضيه
حاولت بمسكنة أهلك
تدير الدفه ع الثوار
وبيها تزود المافيا
لكن عهدك وجبروتك وطغيانك
أظن الصورة كات كافيه
وكات شافيه
نخرت في عضامنا السوس
كلاب تنهش في أبداننا
بقينا زي عود البوص
وبيك كرهتنا أحزاننا
وخليتنا كلاب أغراب
في أوطاننا
وشوفنا ف عهدك
ام الكون
عروسه وللأسف حافيه
ولسه يا كلب من منفاك بتتكلم
قتلت الشعب وليك أحفاد
لسه بيشبطو ف ديلك
وقلب الأمة يتألم
وقدروا ينفذو وصايتك بحزافيرها
عرفت تربي يا معلم
لكن برضو
برغم الليل ورغم الويل
ورغم مهانة الأمه
محال الثورة تتسلم
وقدامنا طريقنا طوووويل
ملاه الشوك
لكن آخره جناين ورد
مستني بلهفة شوق
شباب تمحي ضلام عصرك
وعمرها بيْنا ما تضلم
ساعيتها بس هنقولك
سكوووووت .. مافيش غيرنا هيتكلم