يَا رَحْمَه شَفْقِي عْلَى قَلْبِي رَحْمِيهْ بْلمْحبّه وَالْوَدّ
طَفِّي نَارَجْفَاكْ او جُودِي بُوصَالْ
رَحْمِي عَاشَقْ شَافْ زَيْنَكْ زَينْ الزّينْ يَا زَينَةْ الْقَد
سُبْحَانَ الْخَلاّقْ خَالَقْ دَ الْجَمَالْ
آشِ يْصبّرْنِي صْبَرْتَ صْبَرْتِ ايْلِينْ صَبْرِي فَاتَ الْحَدّ
لَهْوَى مَحّنّي اوْضَرّي رَاهو طَالْ
إيلاَقَلْبَكْ يَارْحِيمَه مَتْهَنّي قَلْبِي ما يَهْمَدْ
يَارَحْمَه يَزّاكْ فَكّي لِي لَوْحَالْ
سَاعَدْ يَا مَسْعُودْ فِي سَعْدِي وَقْتَاشْ يَطْلَعْ نَجْمَ السَّعْدْ
او نَسْعَدْ امْعَا رْحِيمَه امَّ ادْلالْ
عَاشَقْ يَا مَعْشُوقْ مَعْشُوقَه عَيّاتْ عَاشَقْهَا بَالصّدْ
وَالْعَاشَقْ كَيفَاشْ يَهْنَى لِيهَ الْبَالْ
ارْسَلْ يَا مَرْسولْ ارْسَلْتَكْ وارْسلْتْ تَرْسلْ ليَّ رَدّ
كِيْمَا كَانَ الرّدّ رَسْلُو لِي فَالْحَالْ
رَاضِي بَاشَ ارْضَاتْ نَرْضَى وَارْضَاهَا مَالِي مَنّو بَدّ
الْمَيّتْ آشْ ايْدِيرْ فِي يَدّ الْغَسّالْ
شَاكِي واشْكَايَا اشْكِيتُو بَالدّمْعَات تّجْرِي فوقَ الْخَدّ
اشكَيْتُ اوْمَا شَكّيـْتَ اشْكَايَا بِيهَ انَّالْ
رَحْمَه يَا مَرْحوم مَا تَرْحَمْ مّحْرُومْ حَرْقَتْ لِيهَ الْكبْدْ
عُودُو رَاه الْوى مَ لَّهْجَرْ واذْبَالْ
ظَالَمْ يَا مَظْلُومْ ظَلْمَتْهَا وَاظْلاَمْ حَالِي وَاتْسَوّدْ
يَا نَكّارَالْخَيرْ تَسْتَاهَلْ لا زَالْ
مَرغُومْ ا مَغْرُومْ غَامَرْتُ اوْلَغْرَامْ مّرَّغْنِي فَالصّهْدْ
زُوخِي يّا رَحْمَه اغْرَامَكْ مَ لَّبْطَالْ
مَقْوَاهْ ايْلا كَانْ قيسْ اعْلى لَيْلى اتْمحّنْ واتْمَرْمَد
اللّي مَا جَرّبْ مَا يَامَنْ بَقْوَالْ
عُمْري مَا نَحْسَابْ اغْرَامَكْ غَلاّبْ فَالصّرْعَه مَجْهَدْ
حَتّانَ اصْرَعْنِي وْكَرَّفْنِي بَحْبَالْ
يَارَحْمَه لَفْرَاقْ بُوغَه مَ لّشْوَاقْ فيها نَتْمَرْغَد
تْشَفّايْ اوْشَفّي قْلِيبَك مَ لّغْلالْ
شَوّطْني لَبْعَادْ بعْجَاجُو وَقّادْ جَمْرو ما يَخْمدْ
هبّ اللّومُ اوْ زَادْ للشّعْلة تَشْعَالْ
طَبّخْ لِي لَعْتَابْ لَهْوَه مَ لّعْذابْ وَاعْطَانِي نَزْقَدْ
شَخْبَه عَقْلي ذَابْ فِي غَمْرَة لَهْبَالْ
أنْدَادِي بَالْوحْشَه انْهَاري نَتْمَشّى اوْ لَيْليْ نَتْقَنّدْ
نَتْبرّم وانّينْ مَنْ شَدّةْ لَهْوَالْ
يَا نَاسَ الْفَقْره امّالِينَ الْحَضْره والجـّدْبه والْوَجْدْ
عَشْتَ اللِّي عَشْتُوه في سَكْرة لَحْوَالْ
يَا قَاري لَكْتَابْ ابْحَرمةْ لحـْزَابْ وَالسُّوره والْوَرْدْ
أدْعي لَعلّى نبْرا مَ لّعْلالْ
يَا قَلْبِي عَافَاكَ ارْجَعَ الْمُولاكْ بَالتّوبه وَارْشَدْ
واتْرَكْ مَنْ جَافَاكَ ابْزِينُو يَخْتَالْ
نَاظَمْ هَادَالْقُولْ بنَ الطّيّبْ جَلّولْ و بْنِ يْعِيشَ الْجَد
سَاكَنْ أَرضَ تْواتْ بَاعْمَرْ يَا لَفْضَالْ