اوقات
ـــــــــــــــــــــــ
(1)
اوقات بشوف الشمس
القاها ضحكالى
ارفع لها رمشى
تغمزلى بالتانى
واما اتكسف منها
تقوللى ياانانى
"2"
اوقات
اوقات بشوف عصفور
بيلاغى عصفوره
ماتيجى نتواعد
نلعب سوا الكوره
تقوله ياكداب
يابو رجل مكسوره
"3"
اوقات
اوقات على القهوه
اشوف كتير مساطيل
اقعد انا واهوى
واستنى الف دليل
فجأه تقوم كبسه
تشيل جثثهم شيل
وافضل انا وحدى
ويا القمر والليل
"4"
اوقات
اوقات بنام الليل
ومطفى احساسى
فجأه يصحينى
قلمى وكراسى
والشعر يوجعنى
ويقولى يااسى
معقوله تهجرنى
ولصحبتى ناسى
"5"
اوقات
اوقات بشوف النمل
ارش له سكر
واقوله كل ياجميل
بس اوعى يوم تنكر
يقولى ياانسان
لابنعرف النسيان
ولاطبعنا نغدر