رغم الجمال والأدب
انا اختى ليه عانس؟!
وازاى بنكتر ف العدد
وقيمتنا ف الناقص؟!
...
كان رايح يجيب لامه الدوى
فخدوه تحري
قال للعسكرى .. أمى تعبانه ومعاد العلاج
العسكرى.. مرضاش
أقف ساكت
خرج بالليل .. فراح البيت
فلقاها ماتت
تلاتين سنه ..بيشوفنا ف الشاشه
ويمكن مابيشوفناش
......
يوم 25 يناير
كنا حاضنين الرصيف
نطلب
عداله .. حرية .. رغيف
رشونا بالميا .. ممشيناش
طلقوا علينا النار
فالدم .. باش
منطق سخيف
ملعون حبيب العادلى .. ومبارك
واحمد نظيف
تلاتين سنه ..
بيقولوا النصر طياره
بيفكرونا حمير
كأن عقولنا سبوره
وكأننا تبشير
شهر رمضان الكريم
بقى شهر رمضان المبارك
والعيد سعيد
بقى عيد مبارك
تلاتين سنه
ومصر محمد الدره
وهما محتلين
يوم 28 يناير
صرخنا بالتغيير
خرجنا
ف السويس..واسكندريه ..والعريش
مصر كلها ..
كانت .. ميدان تحرير
(مصر التى في خاطرى وفى دمى)
آن الأوان يامصر قوم اتكلمى
وعرفيه
فين السبيل
واسئليه
ازاى ابات عطشان وف أرضى نيل
وليه ..بنخل معتقل من غير قضيه
وليه الزرع متسرطن
وليه بيضرب نار ..ف مظاهره سلميه
ازاى اخويه بينقتل .. وملهش ديه
تلاتين سنه ف الظلم
ازاى ءأدي له التحيه
تلاتين سنه.. وهو عايش ف الحراسه
هيحس بينا ازاى
ف بور سعيد
رايح يقول له شكوته قتلوه
وبيعزفوا له الناى
هي دى بردوا السياسه ؟!
تلاتين سنه
والعسكرى بيأمور الدكتور
وابنه كبر والمصلحه
فيغير الدستور
ويقول لنا
الحكم ف بلدنا بالانتخاب .. مش بالوراثه
ازاى يصلى الفجر وهو متوضى ابنجاسه
تلاتين سنه ..والليل طويل
فعلميه معنى الرحيل
ارحل
وسيب ف الشعب نبض
تلاتين سنه جوانه كبت
ارحل
ماتسبش شئ م الذكريات
مانتاش هرم م الأهرمات
مانتاش الاه..
والله عبد
..................................
اكرم حسن