لسه نايم فى العسل ؟
طب قولّى :
أخبارك إيه ؟
طمنى
شايف غناويك !
وكلام الليل لبيض
لحمر متوسط ف إديك
وعيونك المشجّره
يخرب بيتهم عين أعاديك
مش فاهمين النسبيه
ولا الطفو فى المعلبات
ولا معنى المعلقات البيزنطيه
ميعرفوش التكعيبيه
والرابطه الأيونيه
وفراغية العناقيد
ولا اللولبيه

...............

مقولتليش
مش لسه برضه بتفهمنى ؟
ولّلا كلامى انا كروازييه !
مش انته البيه ؟!
طب قولّى وليه ؟
اما تحب تشوف الطالع
بتروح طالع
للبت لاتانيا
ام عيون تانيه
بنت ماريكا المزّيكاتيه
الواقفه القاعده
بهدومها الحاميه
وجمالها المفروط فرط
عالأسفلت
هناك
على نفس الناصيه
وبكام حرف تلم البخت
بالكلينكس
والشوكه الرنّانه
وكانز البيبس

...............

خليك هناك
مالك بسنيّه ؟
عيون عسليه !
فنجانها تضاريس عربيه !
ليلها طويل
دموعها صحيح دايما وكتير
بس الضحكه ف قلب وجعها
ترد الروح
حتى الحزن نفسه معاها
الروح بتروح
ملهاش في الشوكه الرنّانه
ولا الزنّانه
ولا المواد الحافظه
ولا فرط الرمان
ولا تعرف حد ف حارة السيلوفان
ولا تعرف جربوع فنان
ببرود دمه دايما حرّان
قال إيه وكمان
بيدور بالبيانولا
الجاكت مشبوك فيه فله
بيعد بازلت الشارع الغربي
بإيقاع شرقى
يرقص ويغنى
على توبها العربي
متهجن بثقافه لاتانيه
برعايه ماريكيه
أستاذة المزيكا اللى شوفناها فوق
عالناصيه
بتاعة البخت والكلينكس
اللى ف أى مكان تلقاها
راكبه ف تاكس
وكتير بتشوفها ف إِنِىِ بوكس

...............

إياك فاكر تتهز سنيّه
برغيف سخن من فرن افرنجي
ولّا بفرع فاكهه متأينه
ولّا كلام مخمور بالأندر وير
يا أخى اعقل بقه
خلّيك فـيــر .
سيبك من نوم العسل
وبطّل لحس ف طين الهبل
خلّينى ساكت
متجرِّش ف خناقى
صدقنى
ساعتها لا حد يحوش
ولا حد يلاقى

...............