تقدر تبتسم !!
......................

تقدر تخلّى بسمتك
فوق دمعتك
زاينه الجبين
شايله الحنين هوه الحنين
مش فارقه أبدا دقته
قلبك زمان مهما اللى كان
ضيّع في لحظه بهجته

......................


تقدر تغنى من جديد
وتطير بعيد
تطلع لفوق لأعلى فرع م الألم
وبقش عمرك من جديد
تبنى السكن
الباب آهات
والريح تجرّح ف الغصون
تملاك هموم
تصرخ بصوت قايد شرار
تبرق ف حلقك الغيوم
حزمة شجون غرقانه نار
ويوم ما تسمعها القلوب
ترجع تدوب جوه الحزون
تلقى نفسك والضباب
هوه الصدى
راجع بصوتك يهديهولك
من سكات

........................


تقدر تشوفها وقتها
روحك بتاكل نفسها
والسور حديد
جواه وحيد
قاسمها نفسك حتتين
نصك بيهرى م الوجع
والتاني بيداوى الأنين
بكريم هلع
وانته قاعد من بعيد
عمال تشاهد غلبهم
ونبض قلبك الغريق
جوه منك
يبتسم !!

...........

أكيد هتقدر تبتسم