نص روح

اقبلني سادة
سادة كدة .. من غير إضافات
أنا زي بن الصبح ساعات
لا بيتخلط مع أي حاجه
ولا يقبل السكر زيادة
ولا ينطلب وسط العيون
اللي مالياها البلادة
ولا يتشرب وسط البنات
اقلبني سادة
سادة كدة من غير إضافات
...
اقبلني سادة واقبليني
متتعبونيش
معدش عندي في القلب طاقة
أحب حد محبنيش
واللي فاكر اني فاكر
إنه ليا ف يوم هيرجع
لا ميجيش !
...
أنا اللي طول عمري بعاني
من نفسي والليل والجراح
بعد عمري دا كله ما راح
اكتشفت
اني لما بكون لوحدي
بقيت برتاح
واني قبل كل الوشوش المزيفة
الكون دا كله .. مخوفنيش
...
اقبلني سادة واقبليني .. متتعبونيش
أرواحنا لما بتتلاقي
مابتتشرّطش
والعيون مبتخبيش
والفكرة إني مش هسألَك ولا هسألِك
هو انتوا ليه محبتونيش
الفكرة إني مكنتش أعرف
إني ممكن بنص روح
أقدر أعيش
وإن الزمن دا مليان بناس .. من غير ناس
وناس مفيش ف قلوبها ناس
وناس مفيش جواها ناس
وناس مفيش على بالها ناس
أصنام مبتأثرش فيها
ذرة الإحساس
وناس تخون من فجرها مبتخبيش
وقادرة تعيش !!
وناس بيوصل همها
للحظة تقدر عندها
انك تقول ..
بالشكل دا
الكون دا كله ميلزمنيش
اقبلني سادة واقبليني متتعبونيش
معدش عندي أي اهتمام
بالمجتمع
واللي منع واللي امتنع
كله وجع
حرافيش بتسرق ف الحرافيش
وأنا قلبي مين هيحس بيه
أنا قلبي فيه اللي مكفيه
ولا عنده رغبة يعشق صنم
واللا يرتل في العدم
شعر ونغم
أنا قلبي من كتر الألم
لو حب حد
وكان بجد
مبيقوليش !

قلب مثقل بالجراح انهكته الخيبات
فاكتفى بعزلة يعيش فيها بنصف روح ليعيش بعيدا
عن وجوه كثيرة بلا إحساس
عزلة لا يزاحمها زيف ولا يثقلها حب من لا يحب.
أبيات جميلة رغم ما حملت من ألم
فيها جرس رشيق وحس أنيق واداء مميز عميق
نص ولا أجمل بما حمل من معان ونسج.
دمت ودام إبداعك.