ضمينى

ضميني ف حضنك يا صبية.... وخدينى بعيد
عديني ف اى معدّية.... على فجر جديد
على قد الحلم اللي ف حلمي
على قد العمر اللي ف عمري
على قدي وقدك وحدينا
نرسم أيامنا وليالينا
على ورق الشجر المتبسم
يرقص ويغنى ويقسّم
ويا ليلى يا عين.... ويا عيني يا ليل
يا مغرب عمري مع المواويل
مشتاق وحياتك وظالمنى
وف عز سكاتك تدفني
ويا ليلى يا عين.... ويا صبر طويـــــــــل
ضميني ف حضنك دانا خايف
والخوف ملفوف بالأحزان
بيمد كفوف الحرمان
تدميني وتسرق من عمري... نبضات القلب وأفراحه
وتفوتنى ف موجة تغرقني... والمركب ضاعت مجدافه
والطفل بيصرخ جوايا....... ولا يسمع أبدا لصراخه
ضميني يا عمري وأيامي ... وخدينى هناك
لمكان يجمعنا ف حضن ورود.... مفيهاش أشواك
وزمان الحب هناك موجود
مستني لقانا... متعطش يفرح ويّانا
وترن الضحكة ف شفايفنا
ويغنى الورد اللي شايفنا
نغمـــــــات
بتصحى قلوبنا المولودة...على ضى شعـــــاع القمرات
سلامـــــــات
يا زمان الحب يا متغرب... نفسى تقرب؟
دا انا قلبي وحيد
ضميني ف حضنك يا صبية وخدينى بعيد


.