تانى يا قلم

بتعاودنى وتراودنى ع الكلام

وتقولى اخرج من سجون الصمت

لبراح المعانى والكلام

يكفاك منام

وحشتنى والله كلمتك

فين صرختك

لحظة يضيع المعنى فى وسط الزحام

تقدر تقولى سكت ليه....؟؟؟

جمدت ف عنيك دمعتك

وحبست جواك انتك

ورضيت تكون من غير شجون

لحظة ما يرحل حلمنا ,,,وكاننا

ولا اى شىء ضاع مننا

واهى دنيا ماشيه والسلام

عايزنى يعنى اقولك ايه ؟؟؟

هـنعيدو تـانــى !!!

منا ياما بيك ومعاك سافرت

ويآ الامــانـــى

وف عز عز الحلم جيت انت انكسرت

ولا حد جـانـى

وساعتها بس

حسيت بانك يا قلم مسكين صحيح

عارف بانك يا قلم ديما صريح

ماشى وخلاص !!!

لحسبت سنك قد ايه ممكن يعيش

او حتى حبرك يا قلم يصبح مفيش

ماشى وخلاص!!!

عماله تاخدك خطوتك

هل هيا ماشيه ف سكتك؟؟

ولا ف طريق الانهزام

سكت الكلام

وراجعلى تانى يا قلم ايه الجديد ؟

ايه اللى ممكن يتولد من غير مخاض

مـــنا قـلــبى خــاض !!

علمنى ان اللى انكتب لازم يكون

علمنى ان الحب دا شىء م الجنون

علمنى ان الامنيات... زمنها فات

لما نلاقى الحلم جوانا رفات

ما عدشى ينفع يا قلم غير السكات

***