شوية حاجات
نصوص قصيرة

بتعرف تغني ؟
وعارف وحافظ طقوس التمني ؟
بتحلم وتحزن وتضحك ساعات ؟
متكدبش وتقول
بتحزن وبس

________

إيمانك ملازمك وراصد آمالك ؟
وقادر من الصبر تفتل حبالك ؟
تحاصرك مخاوفك يقل امتثالك
وقادر تقاوم وتطلع لفوق ؟
هتوصل أكيد
دي النجوم مشتقالك

_______

لو اعوَجّ حالك وساءت حياتك
وحسيت بإن الهنا كله فاتك
بتحزن وتيأس وتنسى إنك انت
غفلت عن الذكر
ونسيت صلاتك

_______

عرفت البكا طعمه إيه ف الليالي ؟
ودقت الخشوع ف السجود المثالي ؟
ولما على الروح بيشتد كربك
بتهتف أكيد ربي هيحلها لي ؟
يقينك نجاتك وسكة وصولك
طريقك صحيح
كمِّله للمعالي

_______

شوية حاجات جوَّا روحك بتنبح ؟
ولما بتضعف بتسمعها أوضح ؟
حاجات منها خوفك ويأسك وهمّك
حاجات لو تسيبها هتنهش ف حلمك ؟
حابسها وخايف ف يوم ضعف تقدر
تعدّي حدودها وف القلب ترمح ؟
مخاوفك حقيقة وعزمك أحق
هَتهْلَك مهالكك
بسيف اسمه "لأ"

_______

ظنونك سعيرك ؟
وخايف من الشك ينزف ضميرك ؟
خلاصك نجاتك سعادتك تهمك ؟
وخايف على النار يحَوِّد مصيرك ؟
سؤالك ملازمك
بينخر ف عزمك ؟
وخايف تقوله لتكفر بدينك
وخايف تسيبه يبدد يقينك ؟
طب اسمع إجابة سؤالك سؤال
معمركش يوم دقت طعم المعيَّة
وحسيت كأنه هناك ف الغيوب
متشالالك هدية
وكان لما تبقي المشاكل طوفان
تحس الخلاص جيّ بعد البلية
منين الأمل جيّ غير م اللي قادر
يقلِّب قلوبنا
ويغفر ذنوبنا
وينعم ف عزّ الكروب بالعطية