الديموقراطية
بابا يا بابا يعني إيه الكلمة ديه
بابا يا بابا يعني إيه ديموقراطية
كتير كتير بيرددوها عندنا فـ المدرسة
سألت عنها شِلَّتي قالوا لي كلمة كويسة
معناها إيه مش مشكلة لكن أكيد كويسة
أستاذ كمال و أشرف بلال ومدام نهال بيرددوها كلهم
أستاذ كمال قال عنَّها دي كُلَّها ملهاش لزوم إلا الكلام بس الكلام في المشكلة
تنحل أو حتي تزيد المشكلة . مش مشكلة
ونشيل وزير ونجيب وزير أصله أمير أصله غفير مش مشكلة
يسرق فلوسنا أو يزودها لنا مش مشكلة
أهم شئ فــ المشكلة إن إحنا نتكلم بصوت عالي ونصرخ فـ الفضا
عاش الملك مات الملك مين الملك ؟ مش مشكلة
أشرف بلال بص علينا كلنا هز دماغه مرتين صقف معاهم صقفتين .قال إيه موافق عـ الكلام
مدام نهال قالت :غلط
كل الكلام دا مش صحيح كله غلط
معناها أكبر من كده معناها أعظم من كده
معناها أي واحد مننا يقدر يقول : لا مش كده . لأي مسؤل فــ البلد مهما بلغ من منزلة
يقدر يقول له إنته حرامي أو مخادع أو جبان مهما بلغ من منزلة
قصرك ومالك والخدم دول كلهم من دمنا
وبعد ما تخلص كلامك عنُّهم ترجع لبيتك مش تروح المعتقل
معناها إن الشعب بس هو الحكم
يحكم مصيره فــ الحياة يجيب ملك ويشيل ملك هو الحكم
قام المدير ضرب الجرس وجه يقول :
الفسحة خلصت قوموا يله عــ الفصول .
وقمنا وإحنا كلنا مستغربين ومدهوشين
هيَّ مين وتبقي مين ومنيين جابوا لها إسمها ؟
معنها إيه بتفيد في إيه ؟
ارجوك يا با با قول لنا أرجوك يا بابا قول لنا
رد مع اقتباس
