يعنى .. مصر

يعنى فجر ... إتوضى ضى

نادى آدانه ... على كل حى

نوره جميل ... ومالوش زى

وطيوره صابحه ... مزقزقه

يعنى زهور قطنك ... تبان

تفرش بياضها ... الكون يبان

نرسم غناوى ... ع الحيطان

تمسح جبينا ... من الشقا

يعنى ليل ... ونجومه فضه

بفضل ربى ... نحمد ونرضى

ده رزقه كفى علينا ... وقضى

ويحلى السهر ... وقت اللقا

-----------------------------------

يعنى غيط ... ووابور طحين

يعنى فرن ... ورغيف عجين

ولمه حلوه ... ف التماسى

ع الطبالى ... للشقيانين

يعنى فلاحه ... بطرحه

والشجر ... بالفاكهه طارحه

والإيدين بالحب ... تجنى

والقلوب ... مطمنين

يعنى بدر ... بنوره مال

يوصله ... ضحك العيال

والنسيم يلفح ... خدودهم

وبضياه ... متونسين

-------------------------

يعنى ... حوارينا القديمه

ومن تلاته لسته ... سيما

والجيران ... عاملين وليمه

بالنجاح ... جالهم بشاره

يعنى طاوله ... وشاى وصايا

وجوا قهوه ... تدور حكايه

عن خصوم ... رافعين قضايا

كسبها واحد ... وبجداره

يعنى ... أولادها الشباب

نعلهم ... م اللف داب

والبطاله ... بدون حساب

ضايعه أيامهم ... خساره

--------------------------------

يعنى زحمة ... أتوبيسات


يعنى عادم ... سيارات


وأحلى قعده ... ف العصارى


ع الكراسى .. ف بلكونات


يعنى صوت ... يزعج ودانك


جى من شقه ... جيرانك


وست ... بتخانق ف جوزاها


والشتيمه ... خد وهات


يعنى مستوظف ... حكومه


والجنيه ... وكلاه البرومه


و كل أمنية ... حياته


يلقى ... ستره للبنات


يعنى شارع ... يعنى حاره


ودش منصوب ... فوق عماره


والعقول م الفرجه ... تايهه


عايشه جوا ... مسلسلات
----------------------

يعنى صوتنا ... من فينا

والمصير ... ملك لإيدينا

لا إحنا محتاجين ... وصايا

ولا للعدو ... هنكون حمايه

وغيرنا ... يتشرط علينا

يعنى ... منبعش القضيه

للأداره ... الأمريكيه

ودم أخويا ... يلوم عليا

ونبتدى تانى ... الحكايه
-----------------------------

يعنى دخانه ... وسحابه

معتمه ... فوق روس غلابه

ولسه فيها ... نفوس ديابه

زارعه كل الحقد ... فينا

يعنى توهنا ... ف الحكايه

وإنتهى فصل ... الروايه

وإنتى لسه ... مش معايا

والحيطان ... مش بدارينا

يعنى نعمل إيه ... ياسمره ؟

يام نيل ... والأرض طاهره

والوشوش ... مبقتش ظاهره

بعد ما إتغمت ... عنينا

---------------------------

يعنى أدارى .. ولا أخبى

والهموم ... سكنت ف قلبى

إنتى توهتى ... ولا جنبى

ولا غشيت فيك ... عنينا

ياللى روحى ... بتناديكى

يا حبيبتى ... أنا كلى ليكى

والدموع ... مش بتواسيكى

مهما م الغلب ... إشتكينا

يا طريق ... مفروش بحيرتى

جمعينا ... لو قدرتى

طهرى من تانى ... سيرتى

رجعى لقلبى ... السكينه
------------------------------

فخورة مصر بابنة بارّة كأنت غاليتي

صفو محبّتي

فاتن

نص رائع فخم امتزج بحب الوطن فتغنى وتراقصة له السطور
نفس شعرى طويل ولا ادرى لماذا تم النشر قطع وكوبليهات
ارى انه لو كان نشر مرة واحده لكان له طعم اخر ومذاق اخر فى القراءة والاستمتاع
ولاكنى احترم رؤيتك فى النشر هكذا
الموضوع (النص) للتثبيت اجلالاً وابداعأ ولتعدد مقاطعه وومضاته
تحيتى سيدتى
كونى بالعلا ابدا
وبالتوفيق

السلام عليكم ورحمة الله

استاذتنا وشاعرتنا الفاضلة

تجلت القدرة الابداعية والتسلسل المتناغم لتصوير حال نعيشه ونقد مهذب لسلبيات جمة زدات بها علينا الغمة

قدرة رائعه علي اختيار الكلمات ونفس طويل مع جرس رنان يظهر قوة المعني ويطربنا مع المضمون

كنت هنا

وتقبلي مروري وتحيتي