منتظراك
منتظراك
*****
أنا قبلك
عشقت عينيك
وحبيتك
وياما السهد صاحبنى وقال لى انسيه
ولا نسيتك
بعزم ما فيا حبيتك
وياما ف وحدتى برسم تصاويرك
وأكلم فيك
تكلمنى
واروح ماشيه ف مشاويرك
والاقى الدمع واخدنى لبحر الشوق
مودينى على جنينة من الفرحه
وقصر انا فيه كسلطانه
وأنت التاج
وأنت الدنيا فى عيونى
فرشرشنى على جرحك
أكون فرحك واكون ملحك
واكون ف أيامك البسمة
متبعدشى وتفتح للظنون طاقة
ما انا عارفه إن عشاقك
كتير حلوين
ماهو انت الشاعر الملهم
وانت الفارس المغوار
على حصان الشجن رايح
تفتَّح فى حصون عكا
ومن شكَّه بسهم العشق من حوَّا
تقوم راجع الى حضنى
وتبكى من عيون ليلى وسحر وداد
وفاطمه لما قالت لك
عينيك حلوين
وزينب بالهوى قالت
فقلتلها
وهاله سحرها ساكن فى ضحكايه
وعزه بسمه نديانه ترطب حبك الشمسى
وتنسانى
وتنسى الجرح فى قلبى بينزف شوق
وترجع لى محطة شوق
وانا عارفه أن حبك ليا
موش صادق ولا كداب
وبعد محايله ومناهده أسلم ليك
فؤادى اللى بيعشق
سيرة اللمحة اللى ترميها
فى سكة قلبى اللى يتمنى
جمال طله تدوبنى
بحبك رغم قسوة حبك الجانى
يا سجانى
وهسجن فيك
مشاعر عمر بكتمها
ومنتظراك
كشمس تدق على بابى
فى يوم العيد
***
رد مع اقتباس
المشاركة الأصلية كتبت بواسطة مروة عبدالله
