نور ونار
وحبة وقار
وشوية رمل متبعتر
وميه بايته قُلَيْلَه
تعمل عجينه من إزاز حنَيْنَه
ترسم قلوب
مدوّره ومضلّعه
بأى لمسه من إديك
تتكسر
........
قنديله نور
كلام منثور ومتحوّر
النار
حريقه في السطور
تقرا الجمال موشوم دلال
تقرا الوجع مليان دلع
تلاقى قلبك الخفيف
من كلمتين
يتأثر
........
وهوه نار
وقلبه حار
وقلمه حبره من بهار
يشعوطك
ينتورك زى الغبار
يرسم لوح
بألف صوره عالجدار
بس لشبح !
حالف يلوّن في النهار
بصباع ضباب
ورا منه باب مقفول عليه
هوه بإديه
شايل عنيه
عن صوت ينوح
من غير إيمان
بينادى نوح
ميشوفش منه غير طوفان
مليان جنان
راكب دموع
تحت التياب نايم ف جوع
تنده لقلبك وبحنان
تمسك ف روحه والزمان
يدوس فوقيك
وانته عليك
روحك تعيش
كل يوم


تتحسّر

................