أي حاجة فينا حلوة

للاسف صابها العطب

وتاريخ بلدنا بينشطب

الظلم داير ع الجميع

إغتال بإيدة كل أزهار الربيع

علشان نخش في مرحلة الأنهيار

صدقوني الصمت عار



الحزن خدنا خلاص مقاولة

ياللي سلمتوا البلد للمفسدين والعتولة

العدل شايفة من بعيد

بيهز أوتار النشيد

بيقول لكل الأوفياء

الثورة لازم تكتمل

عمال بيبدر في الأمل



الحق رافض ينتهي

رافض يموت

والشمس لسة باعتة

نورها للبيوت.......

كل الطغاة صدقوني من ورق

فما تسمحوش إن بلدكوا تتسرق



كل اللي باقي فصل واحد في الحكاية

لو سكتنا هتبقي دي أكبر جناية

هننكسف نشوف وشوشنا في المراية

فارفعوا وقت الضلال صوت الهداية