بتندهنى
وبسمعها
وتسألنى عن الهجران
اتارى الليل مضيّعها
مدوبها ندى وحرمان
بتوجعنى !!!
بصوت مخنوق من السُرة
وتجلدنى !!!
بسوط الاسئلة المُـــــــــرة
ولامرة
قدرت اتلم على صوتى
وفى سكوتى
معانى انها حرة .. ومش حرة !!
لقيتنى بضيع كما ذرَة
بحبك ؟!!
والكلام منسى
واحس بحسك الاُنسى
بيتونس مع ونسى
وبافتكرك فلا تنسى
ولاتقسى ولا تعصى
وقد ماتقدرى
حبّينى على مهلك
انا ناسك وانا اهلك
وانا وحدى اللى استهلك
بحبك اه واه مع اى
ياواخده مالحياة الضى
وراويه من نداكى ال مى
وندهانى واقولك جى
ومش هجرة .. انا مسافر
عشان استاهل احضانك
تضمينى
تدوب غربة شرايينى
وارجعلك تهزينى
تصحينى
تبوسى العشق فى عيونى
والاقيكى ......... تلاقينى
ونتحرر من الحاجــة
يامحتاجلك ومحتاجة
وراجعلك ...
لانك شئ فى تكوينى
تضمينى
ضمينى !!
---------------------
حلمى عمر