مقاطع من لحم الحى ... حلمى عمر
مقاطع من لحم الحى
---------------------
-1 -
يادومات الغربة ..... على مهلك
د اللى يحب البحر...... يستهلك
الحلم فى عيون الحبيبة غريق
والبحر طايح فى العباد ... مُهلك
-----------------------------
-2-
هايم حوالين قلبك الانهار
ياترقى نسمة .. او ادوب وانهار
انتى ايمانى ان ليَّّا هناك
ورقة وقلم ورغيف ولمّه فى دار
----------------------------
-3-
ياألف معنى لنظرتى وسكوتى
عودك مُغنّى .. ودقتك صوتى
وأنا لمّا حُضنك ينفتح وأغرق
تطلع قصايدى من صميم موتى
----------------------------
- 4 -
إلا البُكا
أنا مااحتملش أشوف دموع
بتخلِّى روحى فى الفضا متشتتة
والكون يقع والناس تضيع
إلا البُكا
-----------------------------
- 5 -
قلبى فى أقصى اليمين والفكر تاعبنى
والحلم غالب عليه ... والشعر غالبنى
يامصر حضنك دفا والبرد ده من فين
ليه فى مساحة جفا بينى وبين إبنى
-----------------------------
- 6 -
من فين مابامشى بالتقى التوهه
وكأنى موعود بالحوارى السد
هل عشقى ليكي أى شئ عادى؟!
ولاّانتي بتقدّرى اللى بيعشق جد
---------------------------
ـ 7 ـ
وأنا من بعيد
واقف على حدود الوطن
بأبعت آهاتى بالبريد
يسرق جواباتى الزمن
--------------------------
ـ 8 ـ
أنا خدنى أبويا فى حضنه وحكالى
قالّى التاريخ زى الشرف غالى
مهما صحاب الورق داروها فى الضلمة
بكره الحقيقة تبان والحق ح يلالى
---------------------------------
ـ 9 ـ
ساعات كتير بألقانى طفل وسعيد
العب وأشخبط على كل حيطة وايد
ايه اللى خلانى اشيب م المفاجأة
لَّماَّانصدمت فى نجمة علمنا الجديد
----------------------------
ـ 10 ـ
الفجر قال كلمته
ماطلعش من غير محن
ياشعب عاش أزمته
الفجر جى بالوطن
-------------------------
حلمى عمر
رد مع اقتباس
