اهداء للاب الغايب عنا بجسمه العايش فينا بروحه / بابا فوزى
وإهداء للبنت الصابرة الراضية بحكم الله / وردة
******
حيطان البيت
أكيد حاسة بفرق كبير
عشان روحك لها تأثير
ف كل مكان تكون جواه
أكيد حاسة
بإن الجو من غيرك كئيب جدا
أكيد حاسة
بإنك غيبت عنها خلاص
ومش هتحس ولا مرة بصدى صوتك ...فتبكى عليك
وهتحاول تعيش جوا اللى باقى لها
وهيصبرها ف غيابك
براويزك.... وصورتك وياصورة قلب بتحبه
كمان فارقك
فروحت عشان هناك هو المكان اللى التلاقى فيه ملوش اخر
فتجتمعوا بلا فرقة
وسيبتوا قلوبنا للغربة
ومين اللى هيتبسِّم لنا بعدك
و(وردة) قلبك المروية بحنانك
هتلقى حد يرويها بحنان زيك؟
مهوش بإديك تفارقنا
ولا بإدينا نتفارق
لكن عارف
كإن الموت بيختارك عشان تبعد عن المجهول
تغيب عن ضلمة الإحساس ...تروح للنور
ورغم انك مابين اربع حيطان وسكوت
لكنّ حياتنا أضيق من حيطان الموت
تابوت دافن كتير منّا ف حزن كبير
شريط اسود على عيونّا
مغمِّينا عن الإحساس بطعم جميل
كفاية انك بعيد عنّا
ومهما تعبنا واتألمنا وصرخنا بعلو الصوت
أكيد صوتنا مهوش واصلك
ولا بيوصلنا شيئ منك
نشوفك...بس ف الاحلام
تبكِّينا... تفرَّحنا..تصبًّرنا..تشوَّقن ا
تغير فينا شيئ ... ممكن! لشيئ أحلى
ننام ونقوم نقوم ونام
نصبّر نفسنا بأحلام
نفوق ع الواقع المكتوب
بإنك لسة جوّانا
قريب جداااا....بعيد عنّـــا

1/4/2010