عيش الطريق
خليك لوحدك جوه منه
اسبقه
ضلك يفارقك
اجرى تانى والحقه
ملكش غيره
هوه بس ليك صديق
عيش الطريق

..........

الناس ف اسمه بيغلطوا
بيوصفوه بكلمة شبح
كإنه شئ رهيب مخيف
رغم ان قلبه كل ثانيه
بيندبح
عشان عنيك
دايما يلبيه الندا
من غير كلام يحس بيك
يطلع أوام
يفردها ضِلة عتمتك
تلقى الطريق فيه الونس
دمعك ف عينك يوجعه
ولا يشتكيلك
من آلامه وحرقته
غير بس راضى بصحبته
معاك معاك
عمره ما كل من لقاك
نايم بيمشى عالطريق
دليل لقلبك العليل
يسبق تملى خطوتك
رايد لقلبك الأمان
قدمك يدوسه يسبقه
جرّب ودوس فوق منه يوم
تلقاك عاوزلك ألف يوم
ولا تسبقه
متقولش تانى عليه شبح
خليه صديق
اسمع لصمته وأنِّته
تعيش الطريق

..........

ضلك حبيبك
اوعى ليه
اياك تفارقك خطوته
ما هى رحلته
هيه الدليل على خطوتك
ورحلتك زيِّنها بيه
طول ما انته شايفه ف سكتك
هتلاقى دايما فيك نَفَس
بيناديك: انا الونس
وان غاب ف لحظه عن عنيك
اعرف ساعتها ان وقتك عالطريق
عمر انتهى.

..........

يا قلبى الحق ضمها
روحك وناجى ربها
يغفر ذنوب طول الطريق