لأول مرة


(مهداة لروح أخي الشاعر أحمد الشربيني)

لأول مرة ياصاحبي تكون وحدك
لأول مرة تنساني وانا عهدك
لأول مرة تتطمن علي الباقيين
لأول مرة دمع العين يكون خاين
ويتحجر ف نن العين

لأول مرة ياصاحبي ماالحقشي أشوف وشك
لأول مرة طيرانك يكون وحدك
ولاتسلم علي اصحابك ولاعشك
لأول مرة مالحقشي أبوس قورتك
لأول مرة مااقدرشي اشوف صورتك

لأول مرة ياصاحبي ألاقي كلامي مش واضح
لأول مرة ماعرفشي بقيت بكرة ولا امبارح
لأول مرة ماجريشي وارد عليك
لأول مرة تخذلني وماتقولشي كلام واضح
أنا مسافر لوحدي يجوز
لكين حتما ميعاد قرب
يجوز بكرة مدام وقتك كان امبارح
***************************************