رباعيات الغربان

الله الله .. يابلدنا
اصحى يانعسان
شارون كانه بيتمشى
فى بلدنا ويهد العشه
وف ايده رشاش ومحشه
ومولع النار فى السكان
الله الله .. يابلدنا
اصحى يانعسان
دا حضرة السفاح بارع
وعسكره سد الشارع
وبوش اميركا ولاسامع
ورافض انه يكون انسان
الله الله .. يابلدنا
اصحى يانعسان
شارون شيطان غادر سفاح
نسانا يوم طعم الأفراح
دم الشهيد هو المفتاح
صابرا وشاتيلا فى الاذهان
الله الله .. يابلدنا
اصحى يانعسان
محمد الدره وايمان
ماتوا برصاص غدر الطغيان
والكل شايف مش عميان
فين الضمير يابنى الانسان
الله الله .. يابلدنا
اصحى يانعسان
طيران يحوم فوق الروس
صواريخ مدافع موت مدروس
وسلاحنا لسه حجاره وفوس
اتحدوا مره على الطغيان
الله الله .. يابلدنا
اصحى يانعسان
شوفوا العراق واللى جرالها
عاليها أصبح أسفلها
بلير وبوش جابوا أجلها
وحالها يصعب عالغلبان
الله الله .. يابلدنا
اصحى يانعسان
بغداد ضحية أمريكا
والعدل أصبح شيكا بيكا
عالواحده دقى يامزيكا
سلام مربع للجدعان
الله الله .. يابلدنا
اصحى يانعسان
مدد ونظره يامتولى
أمريكا حلفت ماتخلى
بعد العراق عايزه تحلى
والدم طبعا بالمجان
الله الله .. يابلدنا
اصحى يانعسان
يابلدنا ماتفوقى م الغفله
دا الغفله عالأذهان قافله
والكدب لعلع فى الحفله
والكل تايه مش دريان
الله الله .. يابلدنا
اصحى يانعسان
حكوماتنا تقدر تتصرف
تلغى العلاقه اللى تقرف
أمريكا ايه دى اللى تشرف
وليه نقرب م التعبان
الله الله .. يابلدنا
اصحى يانعسان
فيه كلمتين لولاد عمى
مين لوتعبت يشيل همى
ماهو أصل دمك من دمى
وبكره يجمعنا الديان
الله الله .. يابلدنا
اصحى يانعسان
لو نتفق مع بعضينا
نبنى ونزرع بإدينا
دا أرضنا غاليه علينا
ساعتها مانخافشى الغربان
الله الله .. يابلدنا
اصحى يانعسان

الله الله

أعجبتني في تناسقها ورشاقتها
مموسقة ، متحدة
شكرا لإبداعك أخي / سامي

نفتقد هذا الهطول بصفحة الرباعيات يا أستاذنا
لا تحرمنا من هذا الإبداع يا رجل
وصفحة النقد هناك بالأعلى شارك
برأيك الذي يهمنا كثيرا
تحيتي والتقدير


والقصيدة للتثبيت

حمادة

أخي الكريم المبدع سامي عبدالعال
قصيدة عالية الصورة جميلة المنطلق والمعنى والموضوع
لكن دعني اختلف مع اخي حمادة القصيدة لم تنسجم مع بعضها في الموسيقى
بعضها من بحر والبعض من بحر
المهم عشت معك ما يسمونه بالموال او الزجل المتجانس الغير مموسق
واجملها استخدام لفظ الجلالة للفت الانتباه وجذب المتلقي
تحياتي وتقديري

لو نتفق مع بعضينا
نبنى ونزرع بإدينا
دا أرضنا غاليه علينا
ساعتها مانخافشى الغربان
الله الله .. يابلدنا
اصحى يانعسان

هنا بيت القصيد
نحتاج لوحدة تجمعنا على الكلمة وليس على الاختلاف والخلاف
نحتاج صحوة من غفوتنا تعيد لنا مجدنا الضائع
نحتاج صرخة نرى من خلالها ما آلت إليه الأحوال في بلادنا العربية
جميلة صادحة بقوة
بوركت واليراع شاعرنا الفاضل
ومرحبا بك في واحتك
تحاياي