..... ( إهداء لبلدى ) .....

*********************
****************
**********

رفعت للسما عينى
دعيتلك تعلى فوق الكل
تروح الضلمة من أرضك
ونور شمسك علينا يهل
أشوف كرامتك الغالية
ماتعرفشى مهانة وذل
وأشم هواكى من تانى
بريحة عطر ورد وفل
يشيلك ربنا بإيده
وبركاته عليكى تحل
بحبك هفضل انطقها
وعمر لسانى مش هيمل
وهرفع كل يوم اسمك
ومش هتعب فى يوم ولا اكِل

************

يا بلدى مهما أغيب عنك
أكيد عمرى ما بنساكى
ترابك تاج على راسى
حياتى ودنيتى فداكى
عشقتك من صميم قلبى
ووسط الضيقة بلقاكى
ويوم ما الدنيا تتعبنى
بلاقى الراحة وياكى
تضمينى وتبتسمى
وألم الدنيا جواكى
عينى تبصلك تضحك
وننى بالدموع باكى
وأحاول أرفعك ألقى
إيدين الغُرب دايساكى

***********

ديابة عايزة تقطيعك
وجايالنا كما الحملان
وشوش من بره بتمثل
وقلب بالسواد مليان
ولابسين صورة توهمنا
تحسسنا بجو أمان
ولما بيمسكوا السُلطة
يورونا العذاب ألوان
فا مرة ينشروا الفتنة
يخلونا كما البركان
وتانية ينهبوا قوتنا
وما يخلوش رغيف لجعان
وتالتة يبيعوا حضارتنا
عشان نعيش على الإحسان
ولما حد بيعارض
نشوفه بيتسحل يتهان
ويبقى ع التراب مرمى
بإيد ندل وخسيس وجبان

************

دى لعبة خلاص عرفناها
وشلة نصابين مطاريد
كلاب مسعورة وعروقها
بيجرى فيها دم بليد
ديابة كل ما بتاكل
ما تشبعشى وجوعها يزيد
بتقتل إبن وتهين أب
وتسيب أم نارها تقيد
وبتكَفَر فى أى برئ
يفكر بس فى التجديد
ولكن عمرها ما تدوم
اكيد هيهل فجر جديد
هنفضل برضه يا بلادى
نشد الهمة ايد مع ايد
وكلمة وعد هوعدها
ولو بعديها هبقى شهيد
هناضل وأنتفض وأثور
لحد ما يجى يوم العيد

**************
**********
******