بنات الحلم


وبافرد عالسرير جرحى
وافضح كل تعب اليوم
تبان تنهيدة فى ملامحى
واستنى ...
ياخدنى النوم على بكرة
وبين الوعى والغفلة
الاقيها
بتجرى جوة فى عروقى
وتندهلى
تدخلنى براح الروح
وتسألنى
حبيبى قولى نفسك ايه ؟؟
انا ملكك
ومخلوقة عشان نفسَك
ولو تبعد في يوم عنى هتبعتلى
انا عارفاك ..
بتشتاقلى
ومهما تلف عل الأوهام
مسيرك برده ترجعلى .. فمتصدقش
فمتصدقش اكون غيرك
ولا نِّي يوم اكون جرحك
دانا الساكنة تفاصيلك
وانا المجروحة فى ملامحك
وانا ال عارفاك
تشوفنى الناس على عيونك
تخبينى
وتخجل لو تلاقينى
ابان لحظة على شرودك
تخاف لو مرة تتكلم تجيب اسمى
ومهرى بعيد على ايدك
متستعجلش


بعيدة السكة يالعاشق
بنات الحلم
بعيدة الخطوة لو ركبت
فى قطر الوهم
ووحدك ماشى مع كِبرك
وشايل صوتك الـ .. مكسور
تنط السور على صوتى
ومتشوفنيش
وتبعد تانى اناديلك
متسمعنيش
ورغم الزحمة انا سامعاك
فى آهة جرحك الساكتة
وعزة نفسك الرافضة تبوح الهم


وخايفة عليك ...
اقابلك يوم متعرفنيش
ولما ابعد تناديلى ومتشوفنيش
تخاف لو بس هافضل اعيش
فى احلامك
اكون ذكرى لماضى.. ماكانش
واكونلك جرح متألمش _رغم الاهة_فـ سكاتك


انا ماشية صحيح لكن
فى نفس ميعادى هارجعلك
وهارسملك
تقاطيعى فى لون حِسك
وهتشوف طيفى وسط الناس
بيضحكلك
فيجرى ملامح الخطين على جبينك
وتضحكلى
وهاستناك .. تجينى لحد باب الحلم
وتدخل يوم ......
تفسرنى
محمد صادق .... 2007