غنـاوى الحلم ....
ورغم جرحه اللى فـ عينيه
عاشق يبوح ...
عاشق فنون الفضفضة
عاشق يطير فوق الهموم
ويجيب من الحزن الرضا
مجروح اهات
حنجرته ناى
يعزف بقلبه للطيور الصاحية وينادى الفضا
ويغنى فوق خوف الطريق
غنوة مسافر للوطن
فى عينيه سكن للمجروحين / المشتاقين لحظة امل
بيطبطب الجرح القديم
وفـ قلبه اه رافضة الندا
حتى فى سكاته لو يشاور ...
تسمع لصمته مية صدى
مجروح صحيح لكن عفى
ماسك شعاع النور وبيلف القلوب
يصرخ عشم جوة الضمير
اياك تقع
الزيف ضرير
والتيه مصير اللى اتخدع
والغربة ليل ملهوش نهار
لو حتى تحت الشمس ليل
بتشيب القلب الصبى
من خاف طريقه لم سلم .
واللى يخاف عفريته لازم يقتله
امشى وحاضن غنوتك
وسط الزحام
اصرخ امل
اسكت كلام
وان داست الاحلام عليك
احضن ايديك
وارفع دموعك للسما ...
بكلمتين ...
راضى الحياة
ارضى يارب
محمد صادق ... 2007
رد مع اقتباس
المشاركة الأصلية كتبت بواسطة محمد صادق .. اللورد
