سيبهم خلاص...... ( انتصار الهزيمة )
سيبهم خلاص...
وارفع لقلبك فوق فراقهم
مية علم
دوس الالم
من فوق خيول كِبرك
واحرق قلبهم
لما يشوفوك ..
رافع رايات الانتصار فوق ظلمهم
اعلن هزيمة كدبهم جوة حصار صدقك ..
نغم
يعزف نشيد قلبك غُنا
يأسر صفوف يأسك مُنى
يشفى جراح المهزومين جواك
ويحضن دمعهم

سيبهم خلاص
وافرح اوى
انك مفارق ارضهم من غير رجوع
وانك مودع شمسهم من غير شموع
وانك برغم الخوف فى قلبك
ماشى وحدك
عينيك بتـنزف ظلمهم....
.....
بس مش شايفين دموع

سيبهم خلاص
واوعى الرصاص اللى فـْ لسانهم يقتلك
افتحله صدرك وابتسم
اضحك اوى
لساك قوى
وسيب رصاصهم ينتحر
جوة عينيك اللى ابتدت ،
تُعبر خطاوى سجنهم


سيبهم خلاص
وامشى الطريق اللى ابتدا
فى حِسك براحه
سلم على قلبك وطبطب شكوته
اشكى منك ليك
وزعقلك اوى ....
بس ماتقساش عليك
كتم الجراح منك اليك
اهون كتير من حضنهم
محمد صادق ....2007