أقولك حلم ما حلمتوش

أقولك حلم ما حلمتوش
الجو برد
يعني احتمال
الدنيا تشتي ف أي وقت
والوقت ليل
والمستحيل
الشمس تنزل يوم لتحت
والريح بينحت ف الجبل
مش أي نحت
والجمعة سبت
والحد سبت
الاتنين والاربع والخميس
عاملوها سبت
أما التلات ..
كانوا تلاتة ع الحدود
ما لهومشي حد
طب ليه بنتعب نفسنا
ف حساب وعد
يا حبيبتي ماشيه ورايحه فين
خليكي جنبي حبتين
دا انا خت برد
ما تروحيش
أنا أصلي محتاجلك قوي
وناقص لي أرجعلك قوي
بعد اما تهت
لا أنا مرمطون ولا أفلاطون
يا حبيبتي سيبك م الظنون
أنا يعني مت
يا محسساني ان النهار
مشوار طويل !
يا محسساني ان النجوم
وقت اما اقوم
هيا الدليل !
أنا مش قابيل ..
ولا حتي قابل اكون هابيل ..
وانسج خيوط الإنكسار
يا فجر كل ما نندهك
نلقاك سراب
فين النهار؟!
يا رمل كنا بنرسمك
لون البراح
عملوك جدار؟!
لساك مآمن للحصار ؟
قابل تسيبهم يمسخوك ؟
واقف وهما بينسخوك ؟
غايب ودايما تنسى اخوك ؟!!!
دانا بس عايزك تبقى حيلي
وتدوس جيوشك مستحيلي
يا فرحة تاهت من زمن
باستسمحك
هل تسمحيلي
دانا ضهري..........
قوس م الوجع
ولساني..........
سوس راح يقع
وهدومي............
تاهت ف البقع
والليل بزيد
لا علاج لضهري بينفعه
ولا صوتي عارف ارجعه
ولا لون هدومي بضيعه
وجع الوريد
والجو برضك لسه برد
وغطايا حاسس انه سد
والخوف مكتف خطوتي
والخوف شيطان
بلقاه جليسي ف وحدتي
وألقاه بيخنق دعوتي
ساعت اما انام
بحلم بحضنك والأمان
وانا مش مُدان
يا هل ترى عارفاني
وللا القهر غير سحنتي
يا هل ترى فاكراني
وللا هتهربي من محنتي
دانا يوم ما ضعتي
ضاع حنيني وضحكتي
وحاولت أنسى
وانشغل عنك واعيش
وعرفت اقول ما يهمنيش
ماتقاطعنيش
أنا مين وليه؟!
أنا حلم مش قادر عليه!
لكنّي لسه بانتفض
وسعات بعارض واعترض
تحت اللحاف
والهم مش هم المرض
لا كان ضرورى ومفترض
نفضل نخاف
إيه يعني حتى الجو برد
إن شالله تشتي الدنيا سيل
الحل إنك تبقي صهد
أو نبتدي نلبس تقيل
س.حلم لا ينتهي

الله الله الله
الى الاستاذ الشاعر الرااائع/الاستاذ محمد البدرى
تعجز الكلمات عن التعليق فنصك اخذ العقل والقلب راااااااائع
واخجل من التعليق على شعرك يا استاذ محمد
شاعر شعره لا ينتهى
وحلمه لا ينتهى كما قال عنك الاستاذ احمد السرساوى
حلم يطارده الزوال
لكنه لا لن يزول
فانا سمعت شعرك فى مهرجان الثقافة والفنون بكلية الاداب هذا العام
واحييك على هذه القصيدة ونتمنى المزيد كى نستمتع به