بحيرة الوجع
**********



ألمك بيكون على قدّ الجرح
جرحك بيكون على قدّ هواك
وهواك..
يتنفّس بيه الكون
فيكون.. ألمك..
أرض وسماوات ونجوم وكواكب مالهاش عَدّ
وتدوّر مين داري بوجعك..
فماتلقاش حدّ!
ألمك..
على قدّ الحبر اللي ف قلمك
والحبر وريد.. عمّال ينزف
والدمّ.. كلام لونه يخوّف
بيبقّع صفحة أحلامك
وبيسرق منها اللون لابيض
والقلب كريم..
بيضخّ الحزن ف أيامك
فتكلم نفسك وتفضفض
وتصبّر دمعة إحساسك لاجل ما تنزلش
لكن بتخونك وبتضعف قدام الخدّ المتشقق
ويا ريت الحلم بيتحقق!
وبحيرة وجعك عطشانة..
فبتشرب فرحة أنفاسك
وتلفّ الحزن على رقبتك.. وتشدك فوق
يتمرجح جسمك على أرض الحلم المشنوق
وبتبقى خفيييييييف..
وانت بتلمس..
فرحة بْعيدة بطراطيف الشوق
وان شافك حدّ..
بيفتكرك..
بجعة في باليه الأسطورة
ملعون أبو عين اللي يكدّب روحَك ويصدّق دي الصورة
دا انتَ المدبوح
وبترقص بس حلاوة روح
الدمعة.. تنبِّت على خدك..
عود فُل حزين
يكبر وتفوح منه الأحلام الدبلانة ويطرح..
سؤالين
جسمك يتهز من الرهبة.. يتهز العود
يقعوا السؤالين عند شفايفك
صوتك جوّاك يجري عليهم
تصرخ للدنيا وتسألها:
أنا ليه من دون الناس باتألم ألم الكون؟
وانا ليه مش لاقي طريق للفرح؟
فترد الدنيا عليك وتقول:
علشان ألمك..
على قد.. الجرح
!!!
*************
شعر/ مصطفى الجزار
18/6/2011