"أنا والغزال"


الإهداء: إلى جابرييل جارسيا ماركيز

(1)
نتف السحاب فوق فى السما
شرايين .. قلوب متنطورة
وغزال حزين
عمَال بيتنطط هناك
ولا يوم بيثبت فوق غيامة
ولا يوم بيمسح دمعته

(2)
وأنا لسه متسمر
على الأرض اللى جوفها بيشتكى
"جوايا مليون احتمال"
وفإيدى شمعة وسنبلة

(3)
بينى وبينك يا الغزال
قضبان حديد مهرية من زحف الصدا
شباك بيتنفس موات
لوح من قزاز
بينز دمه للسراب
وتراب بيتشكل موات

(4)
لا الحزن يوم هيسيب قلوعى
ولا السحاب هيشيلنى لأجل أسرح معاه

أسامة البيلى
الرياض
26 أكتوبر 2006
السابعة صباحا