ليه محيّرنى السؤال
والإجابة بين إيديّه؟؟
والمحال مابقاش محال
بان خلاص قدام عنيّه

كنت بسأل هيّه مين؟
اللى هتغير ملامحى
واللى هتحلى السنين
واللى نظرة منها تمحى
دمعتى وصوت الأنين
والآهااات المدّاريّه
أيوه هيّه.....

اللى ساكنانى ف ضلوعى
واللى تستاهل دموعى
واللى بيها تكون بدايتى
واللى ليها يكون رجوعى

اللى إحساسى بها
إحساس حقيقى
واللى نظرة منّها
بتبل ريــقى
واللى لحظة ف قربها
تنور طريقى
واللى باعت عمرها
وراهنت عليّه .....
أيوه هيّه

اللى كل كلامها عنى
واللى أقرب ليّه منى
هى دمعى لما أبكى
وهى صوتى لما أغنى

اللى واهبة عمرها
علشان سعادتى
واللى عايزة مهرها
حرفين بخطى
واللى موجة بحرها
بترجع لشطى
واللى حالفة بصبرها
لهتبقى ليّه....
أيوة هيّه