خلاص قرر
بإنه يكمّل الرحلة
ومن غير زاد
ماخدش معاه سوى قلبه...
وكام شعرة من اللي ابيضو من قبل الشياب بمعاد
وراح يفرد قصاده الليل ويتمدد
ويتردد
يقول؟ مايقولش؟ ماعرفشي
فقام كسّر جميع اقلامة ورماها
وساب نفسه
لموج الليل
وراح يرسم بإيده ف السما معنى
ماهوش شايفه ولا فاهمه
لكين حاسة
من الجايز يكون مش راضي عن فرطة نجوم الليل بلا صاحب
فقال بإديه يلضـّمها
من الجايز يكون عدى حدود الوهم بيلملم نسيم الفجر
من الجايز يكون بيكمل اللي نقص م البدر
وليه هنفلسفه إحنا
ده هو نفسه مفهمشي
لأن المعنى ده فايق حدود الفهم
لأن المعنى ده بقلبه - وبس بقلبه – يتحس




باسم زكريا
16/7/2008