بطيبة شعبنا الطيّب
أقول ليكم مساء الخير
ويصبح كل شيء فيكم
براءة طير
جناحكم يتملي بركه
بحب الناس وبلادكم
وروحكم تتملي حركه
تضخ الدم في ولادكم
يقوموا الصبح مبتسمين
لكل مين.. يقابلهم
يزيحوا كل شي محزن
يعدوا فوق مشاكلهم
مساء الخير يا مصراوي
يا قمحاوي بلون الأرض


مساء الخير يا مصراوي
وقوم الفجر أدّي الفرض
مساء الخير ونام واحلم
بان الفرحة جيّالك
وان الصوره مش باهته
ولا تبكيش علي حالك
معاك صحه وقلب نضيف
هيبقوا همّا راس مالك
في أحلك ظرف هتلاقي
عيون الرب ندهالك