متقوليلى
هوه انتى ليه جوه الإطار
متبسمه
بضوء وضل عنيكى ليه
متلونه
وليه إديكى بألف لون
متلخبطه
هوه انتى ليه
متشنكله ؟!
في ركن
بسمه باشتعال
وركن
تايهه بانفعال
والجانبين
ماشيين ف ضد
ضد بينادى الوداد
وضد بيقرر بعاد
والعناد
حاضنك بود
......

متقوليلى
الزعر شابكك ليه بخيط
خلفك جدار
عليه أيام متعلقه
شايلها مسمار السنين
دايب حنين وبلهفته
دوّبها دوب
صداها نشّف دمعته
ولأن قلبه ف الوجع
غِرِق بسنه ف الجدار
شايفه الغبار ؟!
واقف يطبطب فوق كتافه
الخيط بيخنق فرحته
ورغم موته ف دنيته
شايلك بعزم من حديد
واديكى اهو
لسه عليه متعلقه
....

متقوليلى
هوه انتى ليه متفرقه
روحك مسافره في الضياع
متشتته
وفجأه تيجى
رافعه إيدك م الوجع
وتغازلى قلب وبمجون
وترسمى الحرف بدلع
وتكشفى الضهر الشفيف
بصوره تسرق منه طهره وعفته
وبغباء تدورى بيه
راكبك ضلال
بالغي فارش ضحكته
لامم هوام
زيك تمام
شكلك ف توبه ولفته
والاعتراف
سبقك خلاص وتأيدت
براهين عيونك الجعانه
اتكلمت
اتلخفنت
غزلت سفور
كشفت طابور عامل مزاد
لصورة ناطقه بالفجور
ولسه برضه زى ما انتى عالجدار
لكل عابر ماده إيدك
بالحنان
متعلقه
ومتبسمه
.......

متقوليلى
هوه انتى ليه جوه الإطار
متبسمه؟
.........