مرسي اتجوز ...!!!
قالوا مرسي اتجوز مصر ..
قلت الأول يدفع مهر ..
عايز يحكم خمسين شهر ..
عادل يمكن ننسى القهر ..
يبدأ نهضة تفضل دهر ..
……………..
قلت الخطبة تسعين يوم ..
زائد عشرة وتكون صوم ..
ينسى إنه يشبع نوم ..
يقبل يسمع كلمة لوم ..
يقدر يطرد كل البوم ..

.........................
راسم صورة بالألوان ..
مسلم عادل دا العنوان ..
فاتح بابك والديوان ..
طالب حقه والغلبان ..
من طابا لجنوب أسوان ..

..................
عارف إن الحمل تقيل ..
فاضل كام ساعة ف الليل ..
وحدتنا هتكون قنديل ..
خطوة بخطوة نعبر ميل ..
نرسم بكرة لأفضل جيل ..

................

عارف إن الموقف صعب ..
فرقة ف شرق وفرقة ف غرب ..
والغلبان زهقان م الضرب ..
نفسه ف ساعة من غير كرب ..
عايش عمره يسمع نصب ..
وقت الثورة جامد صلب ..
لأ مش خايف مات القلب ..

............
فتّح عينك للمخلوع ..
ناسخ نفسه وِ ف كم نوع ..
إوعى يقولك كان مخدوع ..
إوعى تغشك أي دموع ..
لو قالوا هنموت م الجوع ..
إبدأ نفّذ ف المشروع ..

...........
دوّر دايما ع المظلوم ..
تتحاسب وتبات مذموم ..
لو سبته عايش مهموم ..
إعطي الحق إن كان معلوم ..
يمكن لقمة ف البلعوم ..
تدخل بيها الجنة يوم ..

.............

عايز تعرف تحكم مصر ..
إحفر قبرك جوه القصر ..
تفضل نايم فيه للفجر ..
ربك أكبر تنسى الكِبر ..
حاسب نفسك قبل القطر ..
يسرق دينك شبر بشبر ..
بتقول مؤمن لازم صبر ..
نشهد لك تجوز مصر ..


كلمات
عصــــــــــام ميـــــــــره