إيه الحكاية ؟

غابة من الدشات ..
فوق السطوح منتشرة ..
قنوات فضائية اتخصصت ..
فى الخلاعة , يطلعوا كام عشرة ..
زرعت ف أرضنا للفساد بذرة ..
و ميوعة و مسخرة و شوية نساء فجرة ..
و شباب عينيهم حتطلع على مناظر قذرة .
و الكمبيوتر خصصوه للهلس و الجيمات ..
و ان حتى دخلوا ساعات ع النت و الشبكات ..
ألعاب , مواقع مسخرة , لا علم أو بحوثات ..
حبة مواقع دردشة , بيقولوا عليها الشات ..
و يا ريت حديت فى المفيد ..
لكن معاكسة فى الفتيات.
و جابوا لهم تلاهى جديدة .. اسمها المحمول ..
لعبة و متشعلقة فى الإيدين على طول ..
و تقول لهم دى أذى , و لا فايدة مهما تقول ..
نازلين على قرشهم : هَـمْ هَـمْ .. تقولشى عليهم غول !!
و الواد ده أمه جابت له , أحدث موديل سيارة ..
و الواد دا كله كده .. ما يساوى واحد بارة ..
كانت عليه بوظان و مصيبة و ألف خسارة ..
الواد نسى إنها , عربية , ماهش طيارة ..
طاير بطيارته و ( مُـزته ) لازقه له بكل جسارة ..(1)
باصص عليها مش ع الطريق ..
صدم واحد من المارة .
حيقولوا عليا رجعى قديم , ماهوش حديث و معاصر ..
عقله - يا عينى عليه - فى الماضى اتربط واتحاصر ..
إن كانوا يقولوا : التمسك بالقواعد و السلوك و القيم :
رجعية ..
أبقى أنا رجعى حقيقى .. آى نعم
---------------------------------
(1) مُــزته : البنت متاعته
[CENTER]مصطفى سلام[/CENTER]