! .. بس الأكيد ..!



بس الأكيد ..
إنى هكمّل وحدى
مشوارى البعيد
إنى هعيش ف الليل
أسير
أزرع نوى حلمى
الكبير
يطلع نخيله بدون
جريد
والنّار تقيد
فيّا وتلفح مهجتى
تصرخ براءة ضحكتى
فاكره الألم قلبه حنون
هيحن لما هتشتكى
يا غربتى ..
يا حر ويلى ودمعتى
يا مر ليلى وشكوتى
كان مالى انا ومال الهوي
ليه كل ما احلم بالضيا
القى ضلامى بيتروى
ليه كل ما انده ع الكلام
القى حروف غير الحروف
يرسى الأمان على شط خوف
تايه ومش عارف يشوف
أرض النجاه
يغرق فى موجة ضحك خانقها
البُكا
هيّ الحياه
هيّ الحياه
هيّ الحياه


أحمد فؤاد هاشم