إهداء: إلى من تستحق,,,
........................

إنتى إحساسى بأمانى
واللى نابنى من زمانى
وعندى مية مليون
دليل,
الطريق جايز يضيع
والصديق ممكن يبيع
إنما انتى....
مستحيل,,
..............
إنتى وأمى وكمان نينتى
أحلى تلات حكايات
فـ حياتى
أعلى تلات شجرات فـ جنينتى
أمسى ويومــــــى
وبكره الآتى

نينتى إمبارح ياما حكيت لى
من حواديتها
وأمى بعطف الأم إديت لى
كل حياتها
وإنتى الغنوة اللى إتكتبت لى
وأنا غنتها
ياللى ملكتى القلب بصدقك
واتمكنتى....
إنتى,,,

قبل ماأقابلك
كان منى عينى
إنى ألاقى نصى التانى
قلت أنا محتاجلك ,
ساعدينى
وماصدقتى نطقها لسانى
جيتى بقيتى
أهلى وناسى وكل ماليّه
طمنتينى وشلتى همومى
وخفتى عليّه
أنا لوهكتب ألف قصيدة
أوصف فيكى ...
برضة شوية

لما غرقت ف بحرألامى
مش هنسالك
مدّة إيدك
أنا لوطلت اوهب أيامى
هدّى لعمرك عمرى
وأزيدك
ماانتى الحضن اللى اتعلمت ف
حضنه أدّفى
قلبك بس ف وسط الكون ده
وعدنى ووفى
وعشان كده
الناس لوحِدها
وانتى لوحدك
عندى ف كفة...

ياللى ملكتى القلب بصدقك
واتمكنتى...إنتى